Konferensha
Korte di
konsumidó
Un éksito rotundo!
Dia 27 di mei 2014 Fundashon pa Konsumidó a organisá e “Konferensha Korte di Konsumidó”. E konferensha aki a tuma lugá den oula di nos universidat lokal, universidat di Kòrsou dr. mr. Moises Frumencio Da Costa Gomez a konta ku presensia di diferente dignatario manera nos Minister di Hustisia señor Nelson Navarro i tambe e presidente di nos Korte Komun di Hustisia. E interés general bou di konsumidónan pa e konferensha aki tabata hopi grandi.
Riba e anochi aki, Fundashon pa Konsumidó a hasi entrega di un konsepto di lei “Korte di Konsumidó” na nos minister di Hustisia. Tambe nos a konta ku e oradornan prof. mr. Gerhard Rijken i prof. mr. Jan de Boer. E dia aki sigur tabata un dia speshal pa Fundashon pa Konsumidó. Riba e potrèt por mira e momentu ku a hasi entregá di e kospeto di lei na nos Minister di Hustisia!
Fundashon pa Konsumidó tin mas ku un dékada ta traha riba un proyekto pa bini ku un instansia adekuá kaminda konsumidónan por akudí pa haña nan derechinan. Na Hulanda nos ta mira ku pa disputanan entre konsumidónan i negoshantenan, e konsumidó por akudí na komishonnan di disputa ku ta huzga e kaso i duna al final un opinion na kual tur dos partido ta mará. Mayoria sektor tin nan mes komishon di disputa na kua konsumidónan por akudí.
Na Kòrsou nos no konosé komishonnan di disputa. Sinembargo a bira ora pa bini ku un kaminda di kana pa e konsumidó ora e hañ’é konfrontá ku komersiantenan ku no ta respetá su derechinan. Proseduranan normal na nos korte a mustra di no ta apropiá pa hèndel kasonan di konsumidó. Un di e opstákulonan mas grandi pa e konsumidó pa hasi uso di e proseduranan normal na korte ta e tarifa ku ta kobra e konsumidó ku entregá un petishon. Hopi biaha e tarifa aki ta mas haltu ku e montante di e disputa. Un otro opstákulo ta e periodo ku e konsumidó tin ku warda riba e veredikto di korte.
E konsepto di lei ku a wòrdu entregá na nos Minister di Hustisia ta trese na nos opinion un solushon dor di duna e konsumidó un kaminda di kana ora komersiantenan trapa riba su derechinan. E lei aki ta kue un prosedura di korte aktual i adapt’é pa asina e ta apropiá pa kasonan di konsumidónan.
2
NOTISIA