supermerkado
En kambio, Supermerkado Colon tabatin 12 produkto riba nos lista na e preis di mas abou, e total máksimo,
i solamente 4 produkto na e preis di mas karu. Tampoko nos por keda sin menshoná Esperamos Supermarket ku tabatin 11 di e produktonan riba nos lista na e preis di mas abou, miéntras ku e
supermerkado aki tabatin solamente 6 di e produktonan riba nos lista na e preis di mas
karu.
Pues pa loke ta trata e komparashon di preis di mei 2014, nos tin ku bisa ku a base di nos resultadonan supermerkado Colon a sali e supermerkado di mas barata!
Diferensianan grandi den preis
For di nos resultadonan nos por a mira diferensianan grandi den preisnan di produktonan di laman manera piská i tambe den e preisnan di produktonan di karni i belèg. 1 kilo di Turkey Ham ta kosta
fl. 9.95 na Mangusa Rio, ku ta e preis di mas barata, miéntras ku Albert Heijn ta bende 1 kilo di Turkey Ham na e preis di fl. 24.37. Tin un diferensia pues di fl. 14.42 pa kilo entre e preis di mas abou i esun di mas haltu. Tambe pa loke ta trata keshi Jong Belegen nos ta wak un diferensia grandi den preis pa kilo. Miéntras ku supermerkado Esperamos ta bende 1 kilo di keshi Jong Belegen na e preis di 16.95, ku ta e preis di mas abou, Best Buy ta bende 1 kilo di keshi Jong Belegen pa fl. 28.85; e preis di mas karu. Tin un diferensia pues di fl. 11.90 pa kilo entre e supermerkado ku e preis di mas barata i esun ku e preis di mas karu. Tambe nos a ripará un diferensia basta grandi den e preis pa 1 kilo di piská kòrá (Redsnepper Filet). Miéntras ku e supermerkadonan Arti’s, Esperamos, Mangusa Rio i Mangusa Hypermarket ta bende 1 kilo di piská kòrá na e preis di mas abou, ku ta fl. 17.95 pa kilo, Centrum Mahaai ta bende 1 kilo di piská kòrá na e preis di mas haltu, kual ta fl. 29.29 pa kilo. Tin un diferensia pues di fl. 11.31 pa kilo entre e preis di mas abou ku e konsumidó por haña den supermerkado i esun di mas karu.
Konsultá bo tabèl
Pa fasilitá i pa informá nos konsumidónan mas mihó, Fundashon pa Konsumidó a pone diferente preisnan di produktonan di nos makutu di fruta i berdura den un tabèl ya asina kada konsumidó por tin un bista mas amplio na kua supermerkado ta mas kumbiniente pe hasi su kompranan. Tur interesado ku kier haña kopia di e tabèlnan aki por tuma kontakto ku ofisina di Fundashon pa Konsumidó na telefon: 462-6666 òf via e-mail: [email protected]. Por wak e tabèlnan tambe riba nos wèpsait, www.fundashonpakonsumido.org.