Entre 10 i 16 di mei 2014, Fundashon pa Konsumidó a laga hasi un komparashon di preis bou di diferente supermerkadonan aki na Kòrsou. A anotá preis di un total di 86 produkto. E produktonan aki riba nos lista ta konsistí di produktonan ku nos por kategorisá manera produktonan básiko manera sòpi, aros, funchi, papel di wc, pasta di djente, habon di laba tayó, pero tambe tin algun piska manera dradu, piská kòrá i produktonan di karni manera loinribs, bifstùk mulá i pòrchòp riba nos lista.
Nos tin ku bisa ku pa loke ta trata e komparashon di preis aki supermerkado Alves i Goisco a nenga di partisipá, miéntras ku Albert Heijn no a laga hasi anotashon di su preis di produktonan di karni. E preisnan di e produktonan na supermerkado California tampoko a wòrdu inkluí den e resultadonan di e komparashon di preis, komo ainda e preisnan ta sin OB. Nos ke kòrda tur hende atrobe ku e preisnan den rèki for di 1 di yanüari 2014 mester inkluí OB.
Centrum Mahaai mihó surtí
Centrum Mahaai a sali e supermerkado ku mas tantu di e 86 produktonan riba nos lista, un total di 79, den rèki na momentu ku a pasa pa hasi anotashon di preisnan di e produktonan. Centrum Mahaai a sali pues e supermerkado mihó surtí pa loke ta trata nos lista konteniendo 86 produkto. Na di dos lugá pa loke ta trata e supermerkado mihó surtí nos tin un empate entre supermerkadonan Arco Iris i Mangusa Rio. Tur e dos supermerkadonan aki tabatin 76 di e 86 produkto riba nos lista den rèki na momento ku kolaboradó di Fundashon pa Konsumidó a pasa pa hasi anotashon di preis.
Supermerkado Colon e supermerkado di mas barata..
Normalmente Fundashon pa Konsumidó ta apuntá e supermerkado di mas barata dor di wak den e resultadonan kua ta e supermerkado ku tin mas produkto riba e lista na e preis di mas abou. Sinembargo e biaha aki e supermerkado Centrum Mahaai no solamente tabatin mas tantu di e produktonan riba nos lista na e preis di mas abou, pero tambe alabes tabatin hopi produkto riba nos lista na e preis di mas karu. Centrum Mahaai tabatin un total di 12 di e produktonan riba nos lista na e preis di mas abou, pero tabatin 14 di e produktonan riba nos lista na e preis di mas karu. Pa e motibu aki nos no por apuntá Centrum Mahaai komo e supermerkado di mas barata!
komparashon di preis