Den e dékadanan ku Fundashon pa Konsumidó tin ta sali na vanguardia di nos konsumidónan, nos a bin tuma nota ku den práktika e konsumidó mester di man fuerte pa asina obligá otronan pa respetá su derechinan. E man fuerte ku e konsumidó mester di dje pa por obligá otronan pa respetá su derechinan komo konsumidó, ta nos sistema hudisial. Si un konsumidó kumpra un produkto i e produkto resultá di ta defisiente, e konsumidó tin sierto derechinan ku lei ta dun’é, por ehèmpel derechi riba reparashon grátis òf remplaso di e produkto pa unu ku no ta defisiente. Si e komersiante no ke duna di su banda i nenga na kumpli ku loke lei ta duna e konsumidó derechi riba dje, e konsumidó tin ku bai korte ku su demanda i asina haña un veredikto ku ta dun’é rason i ku e por ehekutá.
Loke hopi biaha ta pasa ta ku, no opstante e derechi pa akudí na korte ku kada persona tin, mayoria konsumidó ta skohe pa no buska nan derechi na korte komo ku e prosedura na korte ta sali hopi sèn (sigur kompará ku e balor di produkto ku nan a kumpra) i ta tuma su tempu. Un persona ku por ehèmpel a kumpra un telefòn di fl. 200,- ku resultá di ta un telefòn defekto, lo no bai gasta sentenáres di florin na korte pa haña su derechi. Pues mester a bini ku un alternativa.
Komo ku e situashon aki sigur no ta kumbiní e konsumidó, Fundashon pa Konsumidó for di aña 2000 a kuminsá ku un proseso pa bini ku leinan pa asina trese kambio den e situashon ferfelu aki. E promé konsepto di lei ku Fundashon pa Konsumidó na aña 2001 a presentá na gobièrnu, tabata proponé instalashon di un komishon ku ta konsistí di un miembro apuntá dor di Fundashon pa Konsumidó. Un miembro apuntá dor di e sektor di komersiantenan i un miembro independiente (geschillencommissie) ku lo skucha disputanan entre konsumidónan i komersiantenan i na final lo bin ku un sentensia final den e disputa. Tur 2 partidonan, e konsumidó i e komersiante, ta mará na e desishon di e komishon aki. E prosedura aki ta hopi mas barata i ta tuma mucha ménos tempu ku e prosedura na korte. E proposishon aki nunka a kristalisá of a haña sosten di gobièrnu.
Na aña 2011 Fundashon pa Konsumidó a bolbe entregá e konsepto di lei, ku algun adaptashon, na gobiernu. E Minister di Hustisia di e tempu ei a sugerí pa aserká Korte ku e tópiko pa wak si un prosedura na korte mes por ta e solushon pa e problema aki. Na aña 2012 prof. mr. Jan de Boer a stèl òp un konsepto, ku den e trayekto di konsultá no por a konta ku apoyo di Órden di Abogado. Na 2013 konhunto ku prof. mr. Jan de Boer, nos a bolbe stèl òp un konsepto di lei ku ta amplia e prosedura pa pidi korte pa emití un ‘rechterlijk bevel tot betaling’ pa esaki asina fungi komo un korte di konsumidó. E konsepto di lei aki lo wòrdu entregá na Ministernan di Hustisia i di Desaroyo Ekonómiko, dia 27 di mei 2014 den e Konferensha Korte di Konsumidó ku lo tuma lugá den e oula di Universidat di Kòrsou di 19:30 – 22:00 or. E konferensha ta habrí pa públiko konsumidó presensiá. Partisipantenan mester registrá di adelantá na Fundashon pa Konsumidó.
Sigur nos di Fundashon pa Konsumidó ta spera ku e konsepto di lei lo trese kambio den e manera ku komersiantenan ta trata ku konsumidónan i lo siña un i tur ku konsumidónan tin derechi i esakinan tin ku wòrdu respetá!
Registrá aki pa
Konferensha Korte di Konsumidó