Konsumidó Alertá Volumen 55 | Page 7

Fair Trade Authority (FTAC) a apuntá e sektor finansiero den su agènda anual 2019 komo un prioridat. Den en kuadro ei Fair Trade Authority Curaçao konhuntamente ku Fundashon pa Konsumidó (FpK) na 2019 a laga RE-Quest Research & Consultancy hasi un investigashon riba e kosto di produktonan pa kliente partikular na bankonan di Kòrsou. Meta di e investigashon tabata pa identifiká kosto i tarifanan di 7 kategoria di produkto bankario partikular, kompará esakinan ku otro i hasi esakinan transparente pa e konsumidó. E produktonan ku a investigá ta entre otro kostonan pa mantené un kuenta koriente, un tarheta di krédito i sera un fiansa personal.

Tur 9 banko a yena un kuestionario onlain ku tabata konsistí di 129 pregunta tokante e diferente tarifa, kosto i porsentahe di interes repartí den 7 kategoria di produkto. E informashon den e rapòrt ta konserní tarifanan bálido te promé di ougùstùs 2019. Tur banko a haña den novèmber 2019 un kònsèpt di e rapòrt pa un kontrol i verifikashon final promé ku e publikashon. Dos banko no a hasi uzo di e oportunidat aki.

Di un banda e resultado di e investigashon ta mustra ku tin diferensia grandi den e nivel di e kostonan, tarifanan i interes mara na e diferente produktonan entre bankonan. Esei ta nifiká ku e konsumidó probablemente por spar sèn dor di kompará e tarifanan di banko ku otro na momento ku e ta tuma un produkto nobo òf na momento e kambia di banko pa e mesun produkto. Di otro banda a sali na kla for di e investigashon ku no ta fásil pa haña informashon transparente i aksesibel. Esaki ta hasi e tarea difísil pa e konsumidó na momento ku e kier hasi un komparashon entre diferente produktonan bankario.

FTAC ta konsiente ku den e periodo for di 1 ougùstùs 2019 diferente banko a adaptá nan tarifanan.

Tambe ta importante pa menshoná ku den e investigashon aki no a tene kuenta ku posibel tarifanan i/òf gastunan, inkluso tempu i molèster, ku e konsumidó ku tin un produkto asina kaba, por wòrdu konfrontá kuné na momento ku e skohe pa kambia di un banko pa otro. Bareranan ku ta hasi kambio di banko difísil pa e konsumidó ta limitá kompetensia i FTAC tin atenshon pa esei.

FTAC lo uza e rapòrt aki komo input pa su tarea di supervishon den kuadro di e Ordenansa Nashonal enkuanto Kompetensia i pa stimulá kompetensia entre bankonan. FpK lo uza esaki pa informá e konsumidó mas mihó tokante e diferensia di tarifanan i interes entre bankonan. E rapòrt ku e resultado di e komparashon di preis aki ta públiko i por download esaki for di e wèpsait di FTAC (www.ftac.cw).

https://ftac.cw/wp-content/uploads/2020/02/Research-Report-on-Banking-Costs-in-Curacao.pdf

No ta un sekreto ku awendia telefòn i internèt ta praktikamente indispensabel den nos bida diario. Sigur mirando ku mas i mas hopi di nos ta usa e plataforma di internèt pa no solamente wak e-mail i buska informashon, pero tambe pa chèt i manda mensahe, hasi yamada di audio di video i strim pelíkula i wak kanalnan di internèt.

Pa un uso intensivo asina bo mester di un internèt stabil i konfiabel. Kompanianan di telekomunikashon ta ofresé diferente pakete di spit di internèt. Dependé kuantu bo uso ta lo bo lo por kumpra un pakete ku mas spit pa asina garantisá un servisio di internèt fluid.

Un merkado habrí i kompetitivo di internèt ta enserá ku un konsumidó tin sufisiente provedó di servisio pa asina e un eskoho i alternativa pa skohe a base di preis, kalidat i servisio. Na Kòrsou nos a mira ku e kompania Flow a atkirí UTS ku konsekuensia ku e konsumidó su poder eskoho entre kompanianan a bira ménos. E kompania Flow/UTS lo mester tin e infrastruktura konhunto na su disposishon i lo nos lo a spera komo kliente un nivel di kalidat i servisio di internèt mas haltu i sigur.

I nèt den e fushon aki di e kompanianan mas i mas kehonan ta drenta i señalnan ta keda tendí den komunidat di keho i malkontentu tokante kalidat di internèt i servisio duná dor di Flow/UTS. I pa esaki, Fundashon pa Konsumidó resientemente a manda un karta pa e kompania di telekomunikashon, den kua ta pone énfasis riba e diferente reklamonan ku últimamente konsumidónan a bini ta ekspresá riba e diferente produkto i servisionan ku Flow/UTS ta brinda.

Hopi ta e kasonan di interupshon konstante di servisio di telefòn i internèt, spit di internèt ku ta fluktua i servisio no profeshonal na kliente ku ta akudí na e kompania e kuestion. Fundashon pa Konsumidó den representashon di nos konsumidónan a hasi un petishon na gerensia di Flow/UTS pa sinta na mesa huntu, ku e meta pa yega na solushonnan konkreto di e reklamonan ku nos ta risibí.

Ta bon pa menshoná ku Fundashon pa Konsumidó ya a risibí un konfirmashon di parti di FLOW/UTS ku nan a risibí nos karta i tambe nos por a tuma nota di un publikashon di Flow/UTS den prensa lokal pidiendo diskulpa na, i pasenshi di su klientenan. Fundashon pa Konsumidó ke sinta na mesa i yega na kompromisonan konkreto i sigur pa sa riba kua término e problemanan ta bai keda solushoná.