Despues di algun luna di ousensia nos revista digital Konsumidó Alertá ta bèk pa informá nos komunidat tokante aktualidat di merkado ekonómiko i tur tópikonan relevante pa nos konsumidónan. Pa problemanan tékniko riba e plataforma di e revista nos no tabata den e posishon pa publiká nos revista riba e frekuensia ku nos ta kustumbrá. Nos ta pidi nos diskulpa pa esaki na nos fiel lesadónan.
For di kabamentu di aña pasá nos isla i mundu hinter ta pasando den tempunan difísil i na un velosidat di kambio haltu. Covid-19 a hasi un impakto devastador riba nos ekonomia, nos trabou i nos bida personal. Pa hopi di nos, sigur esnan ku tin kuenta na Girobank, aña 2020 a habri ku un desafio mirando depósitonan ku a keda di fris na e banko den dezèmber.
Despues ku nos por a disfrutá di nos temporada di karnaval e pandemia di Covid-19 a marka nos bida pa e lunanan ku a sigui den 2020. Hopi di nos a pèrdè trabou, sektor hotelero i di restorant, sektor turístiko, tur a keda aplastá pa e efektonan di e vírus aki. Nos ta gradesido si ku e situashon a keda hopi bon manehá aki na Kòrsou hasiendo ku e konsekuensianan pa salubridat di nos poblashon a keda bon kontené. Laga nos sigui den e bon kaminda i tene nos mes na reglanan di higiena i distansia sosial pa asina nos hasi loke nos por di nos parti pa nos propio seguridat.
Den e edishon aki di Konsumidó Alertá nos lo tin atrobe artíkulonan interesante pa nos lesadónan. Meskos ku semper nos tin nos rúbrikanan di ku ta trata kehonan ku nos fundashon ta trata. Tambe nos ta trata e lastu notisia, derechinan i deber di e konsumidó, kompará i kumpra i hopi otro informashon pa eduká i konsientisá nos konsumidónan.
Pues tuma bo tempu i lesa i disfrutá di nos revista interaktivo. Pa kualke sugerensia òf remarke semper sinti liber pa tuma kontakto ku redakshon di nos revista.
Editorial
EDITORIAL
Direktor
Ban
Konsumidó Alertá ta bèk!
Marc Marshall