DEN CHIKÍ
BATATA TA SALUDABEL?
Un artíkulo chikí pero interesante saka for di Consumentenbond.
Pa mantené e kurpa slank i elegante no nesesariamente mester evitá di kome batata. Batata siertamente ta kontené hopi kolhydrato, pero e ta yenabo bon. P’esei mayoria biaha un hende ta kome ménos di dje ku ora e ta kome aros òf pasta.
Un porshon di batata ta kontené ménos kilokaloria ku aros òf pasta, asta ora bo traha batata machiká i agregá un tiki lechi light i/ òf manteka aden.
Banda di esei batata ta kontené vitamina B6 ku ta importante pa un bon funshonamentu di bo sistema imunológiko i e sistema nervioso, vitamina C, ásido fóliko i fibra.
Komo mama hopi biaha nos ta drùk parti mainta drechando tas i kos di kome pa e muchanan, zòrg pa e kasa ta na tempu i nos ta lubidá riba nos mes. Kuantu di nos, pa e motibu ei, no tin por ehèmpel un kaha di cornflakes den lachi skondí òf ta pasa wak un pastechi promé ku yega trabou? Pa un desayuno a base di sereal ta saludabel, ta bon pa bo sa ku esaki mester kontené ménos ku 10 gram di suku pa porshon. Si e ta kontené mas ku e 10 gram aki, simplemente lo ke bo ta komiendo ta bira un pasaboka ku bo ta usa komo desayuno.
Tene kuenta ku si bo kurpa risibí demasiado suku
fo’i mainta, esaki por okashoná ku bo sistema
por krèsh, lo ke lo no ta un eksperiensha agradabel. Pa mantené bo kurpa i bo stoma satisfecho te ora
di lùnch, ta rekomendabel bo usa serealnan ku ta kontené al ménos 3 gram di fibra pa porshon. Mesun kos ta konta pa proteina; Serealnan ku tin mas di 5 gram di proteina por porshon te mantené bo yen i ta evitá ku bo ta keda kome pa loko durante dia.
Negoshi a bai fayit. Mi kadobòn òf e ‘aanbetaling’ ku mi a hasi awor, e tin balides?
Resientemente Kòrsou tambe a wòrdu konfrontá ku un negoshi prestigioso, mester a sera su portanan. Nan a bati bankrut manera nos ta bisa popularmente. Hopi hende a keda perhudiká. Algun ta tin ‘tegoedbon’ pa gasta, i otronan ta tin produkto ku ainda nan mester a bai tuma.
E pregunta ku ta surgi ta, m tin derechi riba mi sèn ku nan a keda kuné? Dikon no ta dunami mi produkto mi ta mira pará den showcase?
Kontesta:
Den kaso di bankrut òf negoshi a sera, e kliente den mayoria kaso ta kompletamente dependiente di e kuratòr. Un hues ta apuntá un kuratòr ku ta esun enkargá pa finalisá tur asuntunan finansiero di e kompania. Gerensia dje kompania mes no tin nada di bisa mas. E kuratòr lo investigá e aktivonan di e kompania i ki debe nan tin.
Kuratòr den akshon.
Si resultá ku e kompania tin propiedat i aktivonan, e ora ei lo bai over pa parti esaki bou di tur e kréditonan. Kréditonan manera banko i ‘belastingdienst’ tin preferensia. Loke sobra e ora ei, ta bai pa konsumidónan. Tur persona ku a ser perhudiká dor dje seramentu di e establesimentu mester entrega un kleim na e kuratòr, huntu ku un kopia di e dokumentunan pa supstansia su demanda.
Kuratòr por investigá tambe si ainda tin posibilidat pa entregá artíkulonan pendiente òf si por bai na restitushon di un ‘aanbetaling’ hasí. No karga muchu speransa si..Manera nos a indiká mas ariba, banko i ‘belastingdienst’ tin preferensia.
Mi a hiba un artíkulo na e negoshi pa nan drech’é. Kiko awor?
Den un kaso asina ta konsehabel pa mas pronto posibel manda un karta pa e kuratòr indikando kua artíkulo ta di bo i ku bo ke risibí esaki bek mas pronto posibel. Manda tambe mesora e faktura di kompra. Tene kuenta: Si e negoshi a logra drecha bo aparato/produkto, lo bo mester paga e kuratòr e gastunan di reparashon.
Pa loke ta garantia riba un artíkulo ku bo a kumpra serka un kompania ku a bati bankarota, lástimamente e garantia ei no tin balides mas. Semper un konsumidó por purba si serka e fabrikante, indikando e situashon.