Artíkulo kortesia di abogado
Mr. A.V.G. Rooijer,
Siman ku ta tras di lomba, atrobé nos a tuma nota di un kantidat grandi di aksidentenan di tráfiko, te asta ku morto. Esaki sin duda ta relatá na e mal komportashon di partisipantenan na tráfiko. Ekseso di velosidat, pasamentu den lus korá, uso di telefòn selular i inkumplimentu ku nos reglanan di tráfiko ta e motibunan prinsipal di e oumento di aksidentenan di trafiko. Sinembargo, awe nos ke para un ratu ketu na un situashon basta indesea den nos komunidat, esta e falta di protekshon den lei pa un tersera ku no tin falta na un aksidente di tráfiko.
Sa sosodé ku 2 vehíkulo ta dal den otro i un di nan ta bai dal den un tersera, sea riba bròmer, den outo, riba baiskel
i/òf na pia. Esaki hopi bia tin komo konsekuensia, ku esun seguro ta tira falta riba e otro i kontrali. Si no tin muchu klaridat riba kousa di e aksidente, seguronan ta ninga di paga, poniendo ku e tersera ku a sufri daño pero ku no tin falta, su daño tampoko ta ser kubri. Esaki ta un situashon hopi komun aki na Kòrsou. Tristu na e kasonan aki ta e echo ku e víktima despues di kana un kaminda di krus entre su seguro i seguronan di esnan embolbí den e aksidente sin keda kla, finalmente ta tira serbete den rim, kedando atras ku daño material i imaterial enorme. Asta a yega di sosodé ku terseranan sin falta a keda invalido despues di e aksidente i te awe no a risibí niun depchi serka seguronan.
Ta mas ku kla ku esakinan ta situashonnan hopi indesea, pero ku lamentablemente ta tuma luga riba nos isla. Na Hulanda si tin e asina yamá’Regeling schuldloze derde’. E areglo aki ta brinda protekson na e tersera sin falta, den sentido ku e tersera por eksigí daño i perhuisio for di un di e dos otronan embolbí den e aksidente. Esun ku e tersera skohe e ora ei tin e obligashon di kubri daño di e tersera. Si depues resultá ku no ta e ta e kousante di e aksidente, e por eksigí e plaka bèk for di seguro di e kousante real di e aksidente.
Nos ta kere finalmente ku a yega ora pa kuminsá pensa riba un areglo igual na esun di Hulanda. Esaki, mirando e kresementu den kasonan di tersera ku no tin falta na aksidente di trafiko, ku na final ta entregá e lucha i keda sinta ku tur nan daño. Di un manera of otro, mester atende ku e situashonnan indesea aki.
Artíkulo kortesia di abogado
Mr. R. Conquet
RC LEGAL
Mahaaiweg no. 9A
5270622-7880151