Editorial
EDITORIAL
Nos ta spera ku un i tur a gosa di e temporada di fakansi i ku kada unu, na su manera a disfrutá, relahá i rekargá pa un temporada nobo di skol. Sea ku bo por a afòrt di bai den eksterior òf bo a tene un fakansi riba nos mes dushi isla òf bo a pone bo yu den un di tur e plannan di fakansi ku ta keda ofresé na nos muchanan. Semper disfrutá segun bo forsa i no kòrta bo nanishi i fòrsa hasi kos di mas. Biba segun bo forsa ta keda e lema.
Pa hopi aña kaba Fundashon pa Konsumidó ta organisá kursonan di presupuesto pa konsumidónan i tambe pa kompanianan ku ta interesá pa nos hasi esaki pa nan empleadonan. E aña aki, Fundashon pa Konsumidó a duna un otro dimenshon na e esfuerso aki dor di kolaborá ku e organisashon Finansa Hubenil pa duna un workshop di presupuesto na nos muchanan. Meta di e kurso aki ta pa siña nos muchanan for di chikí kon pa dil ku sèn i hasi maneho finansiero parti di nan edukashon. Den nos sekshon di intermedio nos lo trese un reportahe amplio di e workshop i entrega di sertifikado.
E edishon aki tambe lo tin, manera semper hopi artíkulonan interesante i informativo pa eduká i konsientisá nos konsumidónan. Mi ta invitá bo manera semper pa lesa kada un di nan i si tin algu interesante ku awor pa bo personal no ta al kaso pero si den futuro. Kòrda semper ku e edishon aki i tur otro di den pasado ta keda disponibel onlain pa bo por rekurí na dje kada biaha ku bo mester.
Di parti di staf i direktiva di Fundashon pa Konsumidó nos ta deseá un i tur un felis aña eskolar nobo 2019-2020 i éksito ku bo skol, bo estudio i bo futuro.
Atentamente,
Direktor
Ban
Na produkto i servisio ku nos ta bende i kumpra
PONE
STANDART
Marc Marshall
Fakansi ta den terminá i manera tur aña, na luna di ougùstùs, nos ta hasi komparashon di preis di artíkulonan pa e aña eskolar nobo. Den e edishon aki tambe nos ta hasi esaki pa asina nos mayornan por kumpra material pa skol pa nos muchanan na un manera konsiente i benefisioso pa nan. Sigur mirando nos situashon ekonómiko i desempleo haltu, nos ta urgi un i tur pa tuma nota di e komparashon di preis i usa e lista pa kumpra loke ta kumbiní bo mas.