KOMPARÁ I KUMPRA
Back to School
Ya no falta muchu pa un aña eskolar nobo
kuminsá. Netamente pa e motibu aki Fundashon
pa Konsumidó ke enfoká riba e importansia di kumpra produktonan pa skol na un manera konsiente i sabí.
Fundashon pa Konsumidó konhuntamente ku Ministerio di Desaroyo Ekonómiko (MEO), a hasi anotashon di preis na un total di 20 establesimentu, basá riba artíkulonan ku ta nesesario pa nos hóbennan ku ta bai kuminsá un aña eskolar nobo. E meta primordial di e anotashon di preis aki ta pa fasilitá e kompra di mayornan, dunando nan un bista di unda ta kumbiní nan kumpra materialnan pa skol.
Den e periodo di 15 pa 18 di yüli 2019, a hasi bishita na un total di 20 establesimentu i a anotá e preisnan di mas barata optenibel na kada establesimentu.
E establesimentunan ku a forma parti di e anotashon di preis aki ta:
Office Stop, La Curaçao Zeelandia, Curaçao Office Supply, Mensing Caminada, Multi Centrum 2000, Señor Barata, Super Barata, Bruna, Office System, Casa Cesar, Building Depot, Home Plus st. Maria i Zeelandia, Samsom Chobolobo, Jan Noorduynweg i Colon, Samsom Digital Plus, Martis Agencies, Alankar Otrobanda i Good Friends.
Pa fasilitá e proseso di ehekushon, Fundashon pa Konsumidó a skohe e 63 artíkulonan di skol mas usá i kolaboradónan di Ministerio di Desaroyo Ekonómiko (MEO) a anotá e preis mas barata na tur e establesimentunan. Mester enfatisá ku preisnan di artíkulonan pa skol no ta kai bou di un preis máksimo stipulá pa gobièrnu di Kòrsou, kual ta pone ku kada negoshante ta liber pa pone su mes preis. Den e anotashon di preis aki no a hasi komparashon di e kalidat di artíkulonan.
Mihó surtí
For di nos anotashon di preis, Samsom Chobolobo i Samsom Digital Plus a resultá e establesimentunan mihó surtí ku 57 artíkulo. Na di dos lugá ku un kantidat di 54 artíkulo, Samsom Jan Noorduynweg. Samsom Colon i Mensing Caminda ta na di tres lugá ku un kantidat di 51 artíkulo.
Preisnan variá
Fundashon pa Konsumidó a tuma nota di un kantidat di markanan di artíkulonan pa skol disponibel na e diferente establesimentunan. Tur e variashon di markanan aki ta brinda e posibilidat pa konsumidónan por hasi nan eskoho konsientemente. Por ehèmpel e agènda ku plachi di mas barata ta optenibel na Building Depot na balor di fl. 10.95. Un agènda sin plachi na un preis mas kumbiniente ta kosta fl. 5.75 i ta optenibel na Casa Cesar. Pa loke ta trata dikshonario, esun di mas barata (Prisma Engels- Nederlands) ta kosta fl. 15.75 na Curaçao Office Supply. Si ta ‘vulpen’ bo ta buskando pa bo yu? Na Building Depot bo ta haña esun di mas ekonómiko, kual ta fl. 4.95.
Fundashon pa Konsumidó ta brinda mayornan i tur sobra konsumidónan un lista ku tur e establesimentunan, e artíkulonan disponibel i nan preis. Esaki sigur ta hasi e proseso di búskeda di artíkulonan pa skol na un preis kumbiniente i muchu fásil pa tur mayor.
Por risibí e lista di anotashon di preis aki, dor di manda nos un e-mail na [email protected]. Tambe konsumidónan por pasa libremente na nos ofisina situá na De Ruyterkada 53, bèl nos na (5999) 462-6666.
Pa finalisá, Fundashon pa Konsumidó ke probechá di e oportunidat pa deseá nos muchanan un aña eskolar sumamente eksitoso. Un aña den kua disiplina i trabou duru mester ta e base fundamental pa alkansá e meta deseá .
Fundashon pa Konsumidó ta un organisashon independiente ku ta sali na interes di e pueblo kumpradó.
E publikashon aki ta konta ku ouspisio di Ministerio di Desaroyo Ekonómiko.