DEN CHIKÍ
BATATA TA SALUDABEL?
Un artíkulo chikí pero interesante saka for di Consumentenbond.
Pa mantené e kurpa slank i elegante no nesesariamente mester evitá di kome batata. Batata siertamente ta kontené hopi kolhydrato, pero e ta yenabo bon. P’esei mayoria biaha un hende ta kome ménos di dje ku ora e ta kome aros òf pasta.
Un porshon di batata ta kontené ménos kilokaloria ku aros òf pasta, asta ora bo traha batata machiká i agregá un tiki lechi light i/ òf manteka aden.
Banda di esei batata ta kontené vitamina B6 ku ta importante pa un bon funshonamentu di bo sistema imunológiko i e sistema nervioso, vitamina C, ásido fóliko i fibra.
Komo mama hopi biaha nos ta drùk parti mainta drechando tas i kos di kome pa e muchanan, zòrg pa e kasa ta na tempu i nos ta lubidá riba nos mes. Kuantu di nos, pa e motibu ei, no tin por ehèmpel un kaha di cornflakes den lachi skondí òf ta pasa wak un pastechi promé ku yega trabou? Pa un desayuno a base di sereal ta saludabel, ta bon pa bo sa ku esaki mester kontené ménos ku 10 gram di suku pa porshon. Si e ta kontené mas ku e 10 gram aki, simplemente lo ke bo ta komiendo ta bira un pasaboka ku bo ta usa komo desayuno.
Tene kuenta ku si bo kurpa risibí demasiado suku
fo’i mainta, esaki por okashoná ku bo sistema
por krèsh, lo ke lo no ta un eksperiensha agradabel. Pa mantené bo kurpa i bo stoma satisfecho te ora
di lùnch, ta rekomendabel bo usa serealnan ku ta kontené al ménos 3 gram di fibra pa porshon. Mesun kos ta konta pa proteina; Serealnan ku tin mas di 5 gram di proteina por porshon te mantené bo yen i ta evitá ku bo ta keda kome pa loko durante dia.
DEN CHIKI
PREPARANDO PA UN AÑA ESKOLAR NOBO!
Algun informashon balioso pa abo mayor ku tin yu ta bai skol, tene kuenta kuné.
Ta bon pa tur hende tene kuenta ku e siguiente eksigensia i instrukshon ora ta trata kompra i benta di unifòrm di skol
1. Tur esnan ku ta bende unifòrm mester ta inskribí na Kámara di Komèrsio na Kòrsou. Pa kuminsá ku un negoshi ta pidi pèrmit na Ministerio di Desaroyo Ekonómiko (MEO).
2. Esun ku ta bende unifòrm mester mara su mes pa entregá unifòrm durante hinter aña i no solamente na inisio di e aña skolar nobo.
3. Esun ku ta bende unifòrm mester mara su mes pa promé ku komienso di e aña skolar pa entregá e pedido kompletu di hinter aña na e mayornan durante 3 aña largu.
4. Esun ku ta bende unifòrm ta obligá pa sòru pa kada alumno, sin importá e sais di e mucha, haña su pedido kompletu durante hinter aña skolar.
5. Mayornan ta liber pa nan mes buska unifòrm serka un otro pèrsona ku no ta esun ku e skol a enkargá ku benta di mayoria di e unifòrmnan, basta ku e unifòrmnan aki ta kumpli ku e eksigensianan di kalidat ku e skol a stipulá. Tambe mayornan ta liber pa nan mes laga kose unifòrm pa nan yunan, semper bai teniendo kuenta ku e mesun eksigensianan stipulá tokante di e kalidat.
6. Abo mayor, no warda te ora skol será pa kumpra unifòrm pa bo yu. Esaki por hinter aña. Pensa, aktua I kumpra sabí.