INTERMEDIO
Lorem ipsum dolor sit
Kiko ta un kaha fiskal seyá?
Un kaha fiskal seyá ta un kaha ku tin un memoria fiskal. I e memoria aki ta seyá. Ta traha e seyo ku ‘epoxy hars’, òf un otro material paresido, ku hende no por kibra sin ku e ta hasi daño na e ‘moederbord’ di e sistema fiskal.
Implementashon di un kaha fiskal seyá.
Na momento di invershon tin dos pregunta ku e empresario ta sinta kuné:
Kiko pa skohe?
“Kiko pa skohe” i “Kon pa prepará e negoshi pa e kambio ku esei ta trese kuné”.
Pa por kontestá e promé pregunta ta bon pa definí e negoshi. E ora ei por invertí den un sistema ku ta faboresé e negoshi. Mester analisá e negoshi i definí e nesesidatnan ku e tin. Kiko ta e konsepto di negoshi, kiko ta e plan pa futuro di e negoshi i kiko den e situashon aktual lo mester kambia. Empresario mester enfoká riba kompra di un sistema ku ta pas ku su negoshi i ku ta trese benefisio pa e negoshi.
Ta bon pa e empresario tin bon tinu di kiko ta su opshonnan den esaki pa kumpli ku lei. Tin dos opshon di sistema fiskal seyá. Un kaha ku un prenter integrá, òf un sistema ‘Point of Sale’ (POS) kombiná ku un prenter.
Kada un sistema ta apropiá pa algun tipo di negoshi. Pues ta bon pa informá kua ta esun mihó pa e tipo di negoshi i ku ta yuda maneho di e negoshi funshoná mas optimal.
Un ‘POS’ ta un kòmpiuter ku tin un ‘software’ ku tin e funshonnan di entre otro un kaha aden. Un ‘POS’ ta integrá diferente funshon ku e funshonnan di kaha manera maneho di stòk, logístika, merkadeo, programanan di loyalidat di kliente asta tin bia e tin un funshon di prikklòk.
Ta dependé di e situashon di e negoshi, kiko e mester invertí aden pa por kumpli ku lei. E por varia di un sistema kompleto, un softwèr nobo i prenter fiskal, òf solamente un prenter fiskal.
Entrante 1 di Ougùstùs 2014 artíkulo 44a di e lei “Landsbesluit Kasregistratie Systeem” ta eksigí tur empresario di tin un obligashon di atministrashon, di hasi uso di un kaha seyá i tambe duna un resibu na nan klientenan. Pa kumpli ku e obligashon e empresario tin ku hasi un invershon, kumprando un kaha fiskal. E artíkulo aki ta trata kiko e empresario tin di tene kuenta kuné na momento ku e ta bai invertí den un kaha fiskal, pa e por saka lo máksimo for di dje pa su kompania i tambe kumpli ku lei.
Un kolaborashon di :
Nevita M.G. Mezas, BBA CAMS
JustNeva Business Consultant