Tráfiko Motorisá
Fondo di Garantia pa
Asosashon Tráfiko Sigur Kòrsou, abreviá komo A.T.S.K., a keda fundá di 27 òktober 1950. E historia tras di lantamentu di e asosashon aki ta basá riba e echo ku na 1910 e promé vehíkulo a yega Kòrsou i ya pa 1950 esaki a subi te yega alrededor di 7000. Konsekuentemente Kòrsou tabata riba e lista di paisnan ku hopi outo. Esaki a trese kuné ku aksidentenan no tabata okashonalmente mas i ku mester a yega asina leu ku mester a bini ku reglamentashon pa tráfiko di motor.
Ta na e momento aki, algun persona a bini ku e idea ku mester informá i alertá pueblo riba e aspekto di seguridat den tráfiko. Esaki a kondusí na lantamentu di e asosashon manera ya a keda tresé dilanti. Meta ta pa yuda halsa e nivel di seguridat den tráfiko na Kòrsou den e sentido mas amplio di palabra. A.T.S.K. ta purba di logra esaki pa medio di: traha, haña I repartishon di materialnan ku por keda uzá pa halsa e nivel di seguridat riba kaya. Tambe ta bini ku remitidonan den korant; kurso di motivashon I edukashon di tráfiko na nos hóbennan. Na 1965 a inougurá un parke di tráfiko, kaminda muchanan di skol di fundeshi ta risibí edukashon di tráfiko tantu teorétiko komo práktiko
Regularmente A.T.S.K. ta trese su punto di bista den medionan di komunikashon dilanti relashoná ku diferente aspektonan ku ta toka seguridat den tráfiko i anualmente ta publiká sifranan ku tin di aber ku aksidentenan tráfiko.
Manera ya ta konosí, na momento di un aksidente sin herido, e kompania Forensys, ántes 199, ta presentá pa brinda e servisio di yenamentu di sierto formulario I ta indiká ámbos partido pa akudí na nan kompania di seguro.
Problema ta surgi na momento ku un di e partidonan enbolbí den e aksidente no ta sigurá manera lei ta preskribí pa kubri gastunan material relashoná ku e aksidente. Informashon risibí di Forensys ta indiká ku tin hopi vehíkulo motorisá ta move riba nos kayanan públiko sin ta sigurá. Resultado ta ku personanan ku si ta kumpli ku lei ta keda perhudiká. Naturalmente e persona en kuestion por kana kamindanan hurídiko pa logra kubri e gastunan material. Tur hende ta konsiente ku esaki ta un proseso ku ta tuma su tempu i ku tin gastu mará na e proseso aki. Hustamente esaki no ta e intenshon. P’esei a introdusí LAM.
Resientemente a base di kehonan ku A.T.S.K. a risibí di siudadanonan ku tabata envolví den aksidente di tráfiko di kua e kontra partido su vehíkulo no ta sigurá manera lei ta preskribí i komo konsekuensia ku e personanan aki a keda perhudiká , A.T.S.K. a emití un komunikado den kua ta mustra gobièrnu riba gobièrnu su responsabilidat pa e fondo di garantia ta operashonal.
E fondo di garantia aki ta reglá den e lei yamá “Landsverordening Aansprakelijkheidsverzekering Motorrijtuigen”, ku ta keda abreviá komo LAM. For di dia 1 òktober 1982 artíkulo 15 den e e lei aki a drenta na vigor. Den artíkulo 15 di e LAM tin pará bon kla ku e fondo aki ta destiná pa kubri gastunan di esnan ku a keda perhudiká den kaso ku:
- Ora no por determiná ken ta e persona kulpabel
den kaso di un aksidente;
- Ora esun responsabel no ta sigurá;
- Ora e kompania di seguro no por kumpli ku su
obligashon.
E responsabilidat pa e fondo aki bira operashonal ta kai bou di nos Minister di finansa. Artíkulo 16 di e mesun lei aki ta indiká ku ta e Minister di finansa anualmente mester kalkulá e montante ku tin di keda depositá den e fondo aki.
Mirando ku e parti aki ta algu ku tin di aber ku hinter nos komunidat, A.T.S.K. a aserká Fundashon pa Konsumidó pa wak kon konhuntamente I ku kisas mas instansia por kana e kamindanan apropiá pa e fondo di garantia aki ku por mira lus di dia.