Kiko protekshon di datonan personal por nifiká pa e konsumidó?
Na 2011 aña gobièrnu a bini ku un ordenansa di lei pa protehá datonan personal. E ordenansa di lei aki ta basa riba e derechi di privasidat kual ta ankra den nos areglo di estado i diferente otro tratadonan di derechinan humano ku Reino Hulandes (i Kòrsou tambe) ta mara na dje. Den kuadro di esaki, e lei aki ta kontené reglanan ku ta brinda un protekshon struktural na e siudadano pa ku e prosesamentu di datonan personal. Instansianan gubernamental i kompanianan ku ta prosesá datonan personal mester kumpli ku e lei aki. Esaki tambe mester ta e kaso si un konsumidó òf kliente su datonan personal wòrdu prosesá, por ehèmpel ora e sera un kontrakt di Internet. Den e sobra di e artíkulo aki lo sigui referí na e konsumidó òf kliente, apesar ku e lei aki ta protehá privasidat di tur siudadano.
Kondishonnan
Konforme e lei aki, prosesamentu di datonan personal a base di religion, rasa, bida seksual òf otro base en prinsipio ta prohibí. Sinembargo, por prosesá dato a base di e puntonan aki basta ku e kompania tin un meta bon deliniá i hustu pa hasi esaki. Datonan personal ta datonan ku por yuda identifiká un konsumidó òf kliente manera nòmber i fecha di nasementu.
Medida
Ora e ordenansa di lei aki drenta na vigor, e persona òf kompania ta wòrdu pone responsabel pa prosesamentu di datonan personal. Den kuadro di esaki e mester tuma medidanan tékniko i organisatorio pa evitá ku datonan personal ta pèrdè òf wòrdu malusá. Si un konsumidó òf kliente kuminsá duda òf tuma nota di esaki, e por pidi e kompania informashon òf aserka e kolegio ku un keho.
Informashon
Promé ku un instansia tuma datonan personal di e konsumidó òf kliente, e mester suministrá informashon di su identidat i di e meta i motibu pa kual e ta tuma e datonan personal na e konsumidó òf kliente. Aparte di esaki, e instansia mester duna informashonnan adishonal na e konsumidó òf kliente pa garantisá ku e prosesamentu di su datonan personal tuma lugá di un forma adekuá i responsabel. . Banda di esaki e konsumidó òf kliente tin e derechi di puntra si, i si ta asina, ku e datonan personal di dje a wòrdu prosesá. E instansia mester duna e konsumidó òf kliente un kontesta amplio por eskrito denter di 4 siman.
Kolegio di prosesamentu di datonan personal
E ordenansa di lei pa protehá datonan personal ta krea un kolegio independiente ku mester supervisá e prosesamentu di dato konforme e ordenansa di lei aki. Un konsumidó òf kliente por aserka e kolegio ku un petishon pa laga e instituto aki investigá si e toma i prosesamentu di su datonan personal a bai segun e ordenansa di lei menshoná. E Kolegio tin e outoridat di sanshoná sierto violashon di e ordenansa di lei aki ku un but.
INTERMEDIO
Esaki ta algun ehèmpel, pero ta sirbi komo konsientisashon ku e fabrikante di kosnan di hunga “smart” ta pensa riba fasilidat i no riba seguridat. Pa e motibu aki semper ta avisá pa mayornan ta na altura di tur e funshonalidat di e kosnan di hunga “Smart” promé ku kumpra. E desaroyo di teknologia inteligente “smart” ta brinda, lo hasi nos bida hopi fásil, pero semper mester tene seguridat na kuenta, sigur ora e ta trata nos muchanan. Dia fabrikantenan di e pòpchinan “smart” drecha e teknologia, e kosnan di hunga “smart” lo ta un bon amiga di nos muchanan.
Alabes e ta forma un peliger pa e mucha pasombra un deskonosí por tuma kontakto ku e mucha, ku tur konsekuensia negativo ku esaki por tin. Ku e mesun fabrikante aki tabatin un otro problema, esta ku pa usa e pòpchi mester a hinka sierto informashonnan riba un wèpsait pa asina registrá pa e servisio. A bin resultá ku e informashon aki no tabata ser wardá di un manera sigur i asina e rísiko ta haltu ku malechornan via internèt por hòrta e informashon aki. Esaki a pone ku na Fransia i Alemania a avisá konsumidónan pa no kumpra e pòpchi aki i si a kumpr’é kaba pa hib’e bek òf tir’e afó.
Un ehèmpel mas ta e kaso di un“smartwatch” pa mucha ku ta tin un vulnerabilidat ku a krea e posibilidat pa un persona den serkania por skucha kombersashonnan via e oloshi sin ku nos sa. E benta di e oloshi aki tambe a wòrdu prohibí pasombra e tabata kontra di lei di privasidat di Alemania.