NOTISIA
Fundashon pa Konsumidó ku frekuensia ta risibí informenan serka Ofisina sentral di Statistik den kual nan sa indiká e desaroyonan di preisnan pa konsumidó. E luna aki nos a risibí un informe, den kual CBS ta informá ku e promedio di nivel di preis pa loke ta trata luna di febrüari , kompará ku yanüari 2018 a subi ku 0.1%. Esaki tin un inflashon di 1.6% porshento.
Desaroyo di preis luna di febrüari 2018 kompará ku luna di yanüari 2018
.E sifra índise di preis pa konsumidó (CPI, “Consumer Price Index”) di Kòrsou a subi ku 0,1 porshento na luna di febrüari 2018, esta di 127,1 na yanüari 2018 pa 127,2 na febrüari 2018. E kambionan di preis spesífiko ku mas a sobresalí durante febrüari 2018 ta ku na un banda “gas pa kushiná” (+10%) i “batata, berdura i fruta” (+6%) a bira mas karu, mientras na otro banda tarifa di elektrisidat (-6%) a disminuí.
Desaroyo di preis luna di febrüari 2018 kompará ku luna di febrüari 2017
E CPI di febrüari 2018 (127,2) ta 1,3 porshento mas haltu ku e CPI di febrüari 2017, na kual momentu un CPI di 125,6 a wòrdu midí. E sifra aki (1,3%) ta indiká ku e nivel di preis pa konsumidó durante luna di febrüari 2018 ta 1,3 porshento mas haltu kompará ku luna di febrüari 2017.
Desaroyo di preis riba termino largu: inflashon yanüari 2018
Inflashon ta reflehá pèrdida di balor di sèn, pues di forsa di kompra, dor di subida di preis di produkto i servisio pa e konsumidó riba termino largu (usualmente 12 luna). E sifra di inflashon pues ta duna un indikashon di e subida promedio di kosto di bida, i pesey ta wòrdu rekomendá komo instrumento pa indeksashon di salario, penshun, ònderstant/ benefisio sosial, sueldo mínimo i otro entrada.
Inflashon den un sierto luna ta wòrdu kalkulá dor di komparashon di e CPI promedio di 12 luna den e luna konserní ku e CPI promedio di 12 luna den mes luna e aña anterior. Si kompará e periodo di e último 12 luna te ku febrüari 2018 ku mes periodo un aña anterior, ta resultá ku preisnan na averahe a subi ku 1,6 porshento: e CPI promedio di 12 luna a desaroyá di 123,8 na febrüari 2017 pa 125,8 na febrüari 2018. Inflashon na Kòrsou na febrüari 2018 pues ta 1,6 porshento.
Desaroyo di preis riba termino largu: inflashon último 27 luna
Durante di e último 2 aña i piku (27 luna) e desaroyo di preis pa konsumidó a resultá promé den 12 luna di deflashon leve, siguí pa dos luna di sero inflashon i 12 luna di un inflashon ku poulatinamente ta subiendo. Ku e inflashon di febrüari 2018 (1,6%) e trent di subida gradual aki pa promé biaha den 13 luna ta wòrdu transformá den un bahada.
CBS TA INFORMÁ