BO SALÚ
Oumento di kanser
Hopi hende no sa esaki, pero alkohòl ta un sustansia hopi venenoso pa bo kurpa. Dikon? Paso e ta un di e sustansianan ku ta oumentá e posibilidatnan pa haña diferente kanser. Bebedónan grandi tin hopi posibilidat haña di kanser na nan igra i na dikkedarm. Si bo ta bebe 3 glas di alkohòl pa dia bo tin chèns di haña kanser den boka, garganta, stròt di garganta i tripa. E posibilidat ta ainda mas grandi serka personanan nan ku ta huma tambe.
TEP: Loke bo por bisa ta aseptabel: pa hende muhé un glas di alkohòl pa dia ta aseptabel i pa hende hòmber ta dos glas pa dia. Pa evitá ku e bebementu di alkohòl ta/por bira un adikshon, bo mester keda mínimo 2 dia di siman sin bebe.
Loke ta malu pa hasi ta: bo no por kombiná bebementu di alkohòl ku trabou, siñamentu, ora ta hasi deporte òf den tráfiko. Bo no por bebe alkohòl ora bo ta na estado òf bo ta preparando pa sali na estado òf ora bo ta duna e yu pechu. Bo no por bebe remedi ku alkohòl (awa ta e bebida mas mihó pa bebe remedi kuné). No bebe ora bo ta kansá, ku bo tin stress òf ora bo tin problema familiar. No ta bon pa bo bebe alkohòl ora bo ta den proseso di kresementu. Aparentemente e periodo di kresementu ta te ku 18 aña. P'esei ta importante pa no laga muchanan bou di 18 aña hasi uzo di ni un tiki alkohòl. Esun tiki alkohòl ei ta afektá e kresementu di un menor di edat.
Buska yudansa!
Tin hende no ta haña ku nan ta adikto na alkohòl òf nan no sa òf ripara ku nan ta adikto na dje. Adikshon na alkohòl ta ora bo tin mester di alkohòl pa bo ta sinti bo mes bon. Nan Kòrsou nos tin Fundashon pa Maneho di Adikshon (FMA) ku ta atendé ku adikshon sea di bo mes òf pa un familiar di bo. Tuma kontakto ku nan, si bo ta sinti ku bo no tin kontròl riba alkohòl mas. Kòrda ku bo adikshon no ta kura di su mes. P’esei yudansa di otro/profeshonalnan ta sumamente nesesario.