SEYO KIBRá POR KIBRA BO SAKU
Den aña 2013 un konsumidó a aserka nos ku e siguiente keho kontra di Aqualectra. Ta trata aki di e famoso artikulonan 25 i 27 kaminda nos kompania di Awa i Elektrisidat ta multa tur usuario kaminda durante nan kòntròl rutinario, nan topa iregularidatnan na e meter di koriente of awa.
E kaso aki ta un kaso ku ta andando for di 2011. Dia 27 di aprel 2011 konsumidó a tuma nota ku mitar di su kas so tabatin koriente i a yama departamentu di storing di Aqualectra pa bin drecha e situashon.
Den mardugá di 28 di aprel 2011, un trahadó di Aqualectra ta bin wak e situashon pero no por a habri e kashi di koriente. Akinan algún trahadó a opta pa kòrta e seyo dilanti di konsumidó i un otro persona konosí di e konsumidó. E seyo ta un seyo di plèstik ku tin su mes barcode
ku ta mará atministrativamente na instalashon di e kliente i ku ta di un material duradero.
E trahadó a informá e konsumidó ku e kashi di koriente ta bieu i deteriorá i ku e lo traha un rapòrt pe a konsumidó por haña un tapa nobo pa e kashi. Dor ku e tapa di e kashi di koriente tabata asina bieu, e heru a eroshoná loke a pone ku e fiusnan no tabata hasi bon kontakto i ku e trahadónan mester a saka esakinan, raspa nan un poko i hinka nan bek aden. Konsumidó ta konta Fundashon pa Konsumidóku te ku e dia di awe, mas ku 2 aña despues, e kashi di koriente a keda manera e trahadónan a bai lag’é, habri!
Tempu despues, Aqualectra hasiendo su kontròlnan rutinario, ta konstatá na adrès di e konsumidó ku e kashi di koriente ta kibrá. Konsumidó despues a bin ripará riba su kuenta ku el a haña un but di fl.300,-.Esaki sigur tabata un sorpresa desagradabel.
Konsumidó ta bai reklamá Aqualectra, ya ku e ta haña ku e kompania mester a hasi un investigashon promé ku a duna e but. Aqualectra di su banda ta bisa e konsumidó ku den kasonan asinaki ta e tin ku prueba awor ku no ta e a mishi ku e seyo.
Fundashon pa Konsumidó siguiendo desaroyo di e kaso aki, a tuma kontakto ku Aqualectra pa sa kon lew esakinan ta ku e investigashon den e kaso aki. Na Aqualectra nan a deklará ku nan ta bezig ta investigando e kaso aki i si dado kaso haña ku konsumidó a ser kobrá inhustamente, e kompania lo restituí konsumidó su sèn pagá of si e konsumidó tin un kuenta habrí, e montante lo wordu dedusí for di e siguiente resibu.
Ultimo desaroyo : Aqualectra a tuma kontakto ku Fundashon pa Konsumidó i a informá nos ku su investigashon a konkluí ku e konsumidó a wordu kobrá inhustamente, pues, Aqualectra lo kita e montante di but. Kaso será!
E kaso aki no ta unu isolá ya ku Fundashon pa Konsumidó sa ku tin mas konsumidó ku a pasa den tipo di kasonan asin’aki.
IMPOSIBEL