BO SALú
Un bes aki temporada di Karnaval ta tras di lomba i ta kuminsá e preokupashonnan pa wak kon ta baha e kilonan di mas ku nos akumulá. E efektonan di tur kuminda, bebida i pasapalu ku nos kome den periodo aki sigur ta notabel na nos kurpa: e stoma ta reis un tiki dor di uso di alkohòl, kansansio pa motibu di e hopi aktividatnan i hopi síntoma mas, tur huntu ku algun di kilo ku nos a subi.
Pa hopi di nos no ta straño pa den nos resolushonnan di aña nobo tin e deseo prinsipal pa baha di peso. E pregunta ta sinembargo, kuantu di nos ta kumpli ku e deseo aki? Si ta tin un instansha ku ta registrá datonan di kuantu hende lo logra pa kumpli ku nan meta stipulá, anto lo bo ripara ku hopi lo no kumpli ku su meta. Ekspertonan den nutrishon ta sigurá ku un di e motibunan prinsipal ku mayoria di nos no ta logra nos meta di baha peso ta ku hopi ta spera un dieta mágiko ku ta pon’é nos baha di peso den mas tiki tempu posibel.
Dietanan konosí manera esnan di alcachofa, sòpi di siboyo, dieta di sòpi di tomati, dieta di anasa, ta masha na moda entre esnan di sekso femenino. Pero e bèrdat ta ku niun di nan tin resultado berdadero. Al kontrario, dietanan asin’aki si no wòrdu kompaña pa un plan di alimentashon salú por asta trese komplikashon pa esnan ku ta siguié .
Importante ta pa tur hende realisá ku pa superá e eksesonan di dianan di fiesta, ta kuestion di hasi esfuerso i no konta riba un dieta mágiko. E ophetivo mester ta pa banda di baha e kilonan ku nos subi, nos limpia nos sistema interno tambe, eliminá tur tóksiko di tur kuminda i bebida di e dianan di fiesta i probechá di e oportunidat pa adoptá un sistema saludabel di alimentá bo mes. Purba na mantené esaki pa hinter aña. Mayoria hende ta na altura ku kuminda hasá, kuminda lihé (fast food) eiskrim ect ect no ta bon pa nos kurpa. Ta un alimentashon korekto kompañá pa un rutina di hasi gemnastik lo ta klave pa por kontrolá vèt akumulá i mantené nos nivel di kolèsteròl i tambe protehá nos kurpa di malesanan relashoná ku mal alimentashon. Nos mester ta kuidadoso ku loke nos ta konsumí. I nos mester siña resistí tentashonnan. Buska alimentu manera fruta i berdura ku ta salú pa nos kurpa i ku ta yuda mantené suku den nos kurpa na nivel stabil loke na su turno ta eliminá sintimentu di ke kome kada ratu.
Pues, e mihó solushon pa bo resolushon despues di dianan di tantu goso, ta ban baha kilonan di mas. Si nos djis kome, na un manera mas korekto, lo nos por tin sigur ku nos lo logra nos ophetivo di baha di peso i alabes logra un kurpa i mente muchu mas salú.
Algun rekomendashon pa kuida nos mes:
• Baha man na kome karni kòrá.
• Purba di no kome anochi. Pone pa bo mes ku despues di por ehèmpel 7or no ta kome mas
òf kome algu leve.
• No subi kama mesora despues di kome. Duna kuminda un chèns di baha.
• De bes en kuando purifiká bo kurpa.
• Tuma un dia pa bo limpia bo sistema.
• Bebe hopi awa. Ekspertonan ta bisa 8-10 glas di awa ta bon pa bo salú.
• Hasi ehersisio. Kana, jog, kore, hasi kiko ku bo kier basta bo move.
• Evitá uso di vèt saturá.
• Mas variashon bo tin den bo alimentashon, mas garantia bo tin di un kuminda bon balansá
ku ta kontené nutrishon nesesario.
• Baha man na alimentu ku ta kontené hopi suku i salu.