Artíkulo kortesia di abogado
Mr. Rainey Conquet
Un konsumidó ku a diskubrí un mancha riba un shimis ku e la kumpra den un pakus p’e bisti dia di su aña, ta haña rason serka wes i logra haña e plaka bèk ku e la paga pa e shimis serka e doño di e pakus.
Kaso
Tres luna despues di a kumpra un shimis un konsumidó ta diskubrí un mancha riba e shimis, ora e bai pa pas esaki. Mesora e ta tuma kontakto ku e pakus pa splika loke a pasa. Despues e konsumidó ta akudí na e pakus i un trahadó di e pakus ta skibi riba e bon, ku nan lo duna e konsumidó su sèn bek. Sinembargo, despues di esaki e doño di pakus ta ninga di duna e konsumidó su sèn bek, alegando ku e mancha na e shimis ta pa falta di e konsumidó mes.
Despues di esaki e konsumidó ta manda un karta pa e komersiante i disolvé e kompra i pidi su sèn bèk ku e la paga. Ora ku e konsumidó no a haña niun reakshon di parti di e komersiante, e ta akudí na Korte. Pa kuminsá Korte ta konstatá ku e artíkulonan di lei den buki 7 di nos Kódigo Sivil ku ta regarda kompra di konsumidó ta aplikabel riba e kaso. Wes ta konstatá tambe ku e defekto na e shimis a wòrdu deskubrí denter di 6 luna. Esei ta trese pa lei kuné ku por sali for di e punto di bista ku e shimis tabatin un defekto for di momentu di e kompra.
E komersiante di su banda a alegá ku e mancha ta unu di kima di heru di strika. Tambe e komersiante a trese dilanti ku e konsumidó a pas e shimis dilanti di e trahadó di pakus promé ku e la kumpr’é i nan niun no a konstatá e mancha. Tambe e la trese dilanti ku ta masha remarkabel ku ta despues di 3 luna numa, e konsumidó a diskubrí e mancha na e shimis.
E echo ku e trahadó a palabrá ku lo duna e konsumidó su sèn bek, tampoko tin algun relevansia segun e komersiante, pasobra e trahadó no tabata sa ku e konsumidó a bisti e shimis ku e mancha tòg dia di su aña. Segun e konsumidó ta hustamente pa su aña e la kumpra e shimis, p’esei ta ora ku e tabata serka di hasi aña e la bai pas e. Tambe e la bisa ku e la bisti e shimis tòg dia e la hasi aña pasobra e la pidi e pakus un otro, pero nan no tabatin un otro p’e. Wes a tuma nota di loke partidonan a trese pa dilanti. Sinembargo, dor ku e mancha tabata unu ku no ta por sali for di e shimis i dor ku e komersiante no tabata por a duna e konsumidó un otro shimis tampoko, wes a duna e konsumidó rason i stipulá ku e komersiante mester dun’e su sèn bek i paga tambe tur gastu di e proseso.
Konklushon
Di nos banda nos ta haña e veredikto aki unu masha remarkabel. Sinembargo, e ta laga mira ku lei por bai hopi leu ora ta trata protekshon di e konsumidó.