IMPOSIBEL
Algun di e aspektonan aki, manera añanan di no-claim, ya kaba ta keda usa pa kompanianan di seguro pa kalkulá bo prima. Pero lo ke no ta hustu ta hasi uso di e balor di outo di katalòg komo base pa kalkulá bo prima. Si nos tuma nota, na otro paisnan hopi biaha ta usa e peso di e outo komo base prinsipal pa kalkulá bo prima. Esaki pa e simpel motibu ku mas pisá bo outo ta mas daño e por okashoná den kaso di un choke. Si un dòmtrùk dal den bo outo e lo okashoná sigur mas daño ku un outo chikitu. Konsekuentemente e outonan ku tin mas peso i tambe ta esnan mas malu pa nos medioambiente lo paga mas tantu na seguro. Kisas un insentivo tambe pa nos kuminsá kore outonan mas mediano i chikitu.
Konsekuentemente e outonan ku tin mas peso i tambe ta esnan mas malu pa nos medioambiente lo paga mas tantu na seguro. Kisas un insentivo tambe pa nos kuminsá kore outonan mas mediano i chikitu.
Otro punto di importansia ta e sumanan pa kua nos por sigurá nos outo WA p'e. Te na e momentunan aki bo por sigurá bo outo pa e sumanan di 90 mil, 150 mil, 200 mil, 250 mil i 300 mil florin. E sumanan aki ta enserá e montante kompletu ku bo seguro lo kubri na daño di e kontrapartido. Dado kaso daño di e aksidente ta surpasá e montante pa kua bo ta sigurá, abo komo doño di outo ta responsabel pa e diferensia.
Tene na kuenta ku no solamente daño material ta keda kubrí ku e suma aki, pero tambe gastunan inmaterial òf si bini claim si un persona fayesé òf keda paralisá a konsekuensia di e aksidente. Mirando preisnan di outo riba nos merkado, bo por kuestioná si un montante sigurá di 90 mil florin ta realístiko awendia.
Al final nos por referí na nos seguronan adishonal di WA+ i All-risk, kaminda manera ya bisá, ta usa e balor di katalòg pa kalkulá bo prima di seguro. Solamente ta remarkabel, ku na momentu ku bo tin daño pa claim, e kompania di seguro di tendensia di bini ku balor aktual (dagwaarde) en bes di balor di katalòg (cataloguswaarde). Ke men ta kobra bo a base di balor nobo i ta paga bo a base di balor aktual.
Manera bisá, nos mester revisá nos sistema di seguro di outo. Es mas, nos mester revisá nos vishon integral riba mobilidat i seguridat den tráfiko. Laga nos hasi esaki di un manera integral i konsiso, atendiendo ku tur aspekto pa asina hisa kalidat i seguridat di un manera struktural riba nos dushi isla.