KOMPARÁ I KUMPRA
Den e periodo di 29 di novèmber pa 7 di desèmber Inspektornan di departamentu di Inspekshon Ekonómiko a bishitá 13 supermerkado pa anotá preis di e produktonan di makutu di Pasku. A anotá preis di 113 produkto for di vários kategoria, entre otro ham, orea, pekelé, salmou, biña, ròm, serbes, limonada, fruta seku etc. Supermerkadonan ku a partisipá na e komparashon di preis aki ta, 2000, Arco Iris, Best Buy, Bon Bini, Boulevard, Centrum Mahaai, Centrum Piscadera, Esperamos, Mangusa Rio, Mangusa Hyper, Zhifeng, New Plaza i Vreugdenhil.
Pa asistí konsumidónan den nan kompra di fin di aña, Fundashon pa Konsumidó a hinka tur e sifranan den un tabèl i a hasi un análisis di esakinan. Fundashon pa Konsumidó ke enfatisá ku nos no a tene kuenta ku kalidat, ni tampoko pais di orígen den e komparashon di preis, esaki por tin influensia riba e preisnan.
Mangusa Hypermarket, esun mas barata!
For di nos análisis di pakete di Pasku, Mangusa Hypermarket a sali e supermerkado ku mas tantu produkto na mihó preis. For di e 113 produktonan ku a keda pre selektá, Mangusa Hypermarket tin un total di 34 produkto na un preis mas kuminiente. E produktonan aki ta entre otro: Pekelé i Makrel ku wesu òf sin wesu, Ponche Kuba, Johnny Walker Black i Red Label di 2 liter, kaha di serbes Heineken, Amstel i Polar , Pruimu ku pipita etc. E di dos supermerkado ku preis mas kuminiente ta Mangusa Rio. Mangusa Rio tin un total di 29 produkto for di e 113 produktonan. E di tres supermerkado ku preis mas barata ta Bon Bini supermerkado, ku un kantidat di 27 produkto.
Mangusa Hypermarket e supermerkado mihó surti
Di akuerdo ku resultadonan di e análisis di pakete di Pasku, aparte di ta e supermerkado mas barata, Mangusa Hypermarket a resultá esun ku mas asortimentu. Di e 113 produktonan ku a keda pre selektá, e supermerkado aki ta tin 99 produkto. E di dos supermerkado a sali Mangusa Rio ku 93 produkto, siguí pa Centrum Mahaai ku 83 produkto.
Diferensia di preis
For di riba nos tabèl di komparashon nos por a tuma nota di diferensianan konsiderabel den preis di algun produkto, spesialmente den e kategoria di ‘kerstspecialiteiten’. Un kilo di pekelé sin wesu por ehèmpel. Esaki ta optenibel na Mangusa Hyper na balor di fl. 16.50. Na Boulevard Market Place esakita kosta fl. 25.95, kual ta un diferensia di fl. 9.20.
Un kilo di makrel sin wesu ta kosta na Mangusa Rio i Hypermarket fl. 15.00. Na Esperamos supermarket esaki ta kosta fl. 29.35, kual ta un diferensha di fl. 14.35. Salmou di Canada sin wesu tambe tin un diferensia di preis notabel entre diferente supermerkadonan. Un kilo di esaki ta kosta na Best Buy supermarket fl. 43.25 i na Vreugdenhil supermarket esaki ta kosta fl. 57.69, kual ta un diferensia di fl. 14.44.
Analisando e komparashon di preis di makutu di Pasku, Fundashon pa Konsumidó ta konsehá tur konsumidó pa konsultá e lista di komparashon di preis i asina hasi un eskoho konsiente i responsabel. Bishitá nos wepsait, www.fundashonpakonsumido.org pa mas informashon tokante di komparashon di preis di makutu di Pasku.
Fundashon pa Konsumidó ta deseá tur nos konsumidónan felis dianan di fiesta. Disfrutá di kada momentu den kompania di sernan kerí na un forma responsabel. Kòrda riba e presupuesto!
MAKUTU DI PASKU