MI PRIMA
DI SEGURO?
Mirando ku e tópiko di prima di seguro ta aktual i kontroversial, laga nos hasi uso di e oportunidat pa splika algun aspekto di bo prima di seguro. Den e prólogo di nos edishon di novèmber nos a dediká atenshon na e maneho di seguridat den tráfiko, indikando ku un enfoke integral di maneho di tráfiko ta nesesario pa yega na tráfiko mas sigur riba nos isla. Atendé miho ku komportashon di usuarionan di nos karetera, sinkronisá informashon entre gobièrnu i kompanianan di seguro i bini ku kontròl severo i efikas ta esensial pa solushoná e problema ku nos ta konfrontando den e sektor di tráfiko. I sigur instituí e Fondo di Garantia ku pa añanan kaba e keda stipulá den nos leinan.
Un punto ku sigur nos ke pone atenshon na dje ta e sistema di kalkulá prima di seguro. Nos por diferenshá tres tipo òf kategoria di seguro di outo aki na Kòrsou. E suguro obligatorio ku kada outomibilista mester tin ta e asina yamá seguro WA ku ta kubri daño na un terser partido okashoná pa e asegurado. Si bo ke un kobertura mas amplio tin e seguro asina yamá WA+, ku por kubri sierto dañonan aheno manera pro ehempel kiebro den outo. I nos konosé sigur e seguro “All-risk” ku ta kubri mayoria insidente ku por pasa bo outo.
Ta lógiko ku pa seguronan den e kategoria di WA+ i All-risk, e balor di bo outo ta importante. Mas karu bo outo ta, mas sèn bo seguro lo mester paga na momentu ku algu pasa bo outo. Konsekuentemente mas karu bo outo ta mas prima bo seguro lo kobrabo pa kubri su gastunan. Pa esei e kompania di seguro ta usa e balor di katalòg di bo outo, komo balor pa kalkulá pa prima di outo. Mi ta kere ku nos tur por ta di akuerdo ku esaki.
Awor si nos ban bèk na nos prima di WA (wettelijk aansprakelijkheid), ku ta bo responsabilidat legal di kubri gastunan di un aksidente ku bo a okashoná òf tin falta p’e, lo mester tin un relashon entre e balor di bo outo i e daño ku e lo por okashoná na un otro outo? Lo ta parse ku nò. Un seguro WA no ta kubri daño na bo outo. Pakiko e ora ei e balor di bo outo ta relevante? Lo bo a kere ku aspektonan mas relevante manera peso di e outo, edat di asegurado, añanan ku e ta kore sin kousa aksidente por ehèmpel, ta aspektonan di hopi mas relevansia pa por kalkulá un prima bon konsiderá.
Kon ta kalkulá