BO SALÚ
Ora e nivel di suku den sanger yega un sierto márgen abou, e pánkreas, e hypofyse i e nirnan di reserva ta bai produsí hormonanan ku ta sòru pa e produkshon di insulina stòp. Serka e hende salú ta papia di un wega huntu entre e hormonanan, p’asina por mantené un nivel di suku den sanger mas normal posibel. Serka esnan diabétiko, tin estorbo den e wega huntu aki, pasobra e pánkreas ta traha muchu tiki insulina òf no ta den posishon pa traha insulina mes. E forma di diabétis aki, pues falta di insulina kompletu, ta surgi mayoria bes na un edat hopi yòn.
Nos ta papia aki di diabétikonan dependiente di insulina, yamá tambe diabétikonan tipo I. Ora e kurpa no por traha insulina ètòl mas, e persona aki mester uza insulina artifisial. Esaki por sosodé via angua un o mas biaha pa dia. Ora e kurpa ta traha tiki insulina, ta duna remedi pa sòru pa e tiki insulina, ser uzá bon òf ta stimulá e pánkreas pa un produkshon mas grandi di insulina. Den algun kaso un dieta por ta sufisiente, kaminda tin un bon peso. E tipo di diabétis aki ta surgi hopi biaha na un edat mas avansá. Nos ta papia di diabétikonan no-dependiente di insulina òf e asina yamá diabétikonan tipo II.
Faktornan ku no ta kousa diabétis, pero ta sòru si pa e malesa sali na kla ta: sobrepeso, embaraso, edat i strès.
Síntomanan serka diabétis: ta uriná hopi, set, pèrdida di peso, sintimentu di hamber, chèns grandi pa haña infekshon di kueru manera espinia, grawatamentu, kansansio i mira wazig.
Kon pa prevení?
Mantené un dieta saludabel: Evitá produktonan rafiná manera pan blanku, produktonan di hariña, alimentunan prosesá, refresko.
Kontrolá e peso: Personanan ku peso di mas tin resistensha na insulina i esei ta kousa ku e nivel de suku den e sanger ta oumentá y por konsekuentemente por okashoná mal funshonamentu dje organismo.
Hasi aktividatnan físiko ku regularidat: Moveshon i aktividat físiko konstante ta yuda tene e peso bou di kontròl i tambe ta yuda mantené e nivel di suku normal.
Konsultá na tempu: Ta rekomendabel pa ora subi 40 aña, kontrolá kada 3 aña e nivel di suku. Si tin historia di diabétis den famia, konsulta bo dòkter di kas i laga hasi e tèstnan nesesario.
Bo tambe por kuida, basta bo ke!
Outor: Sr. Melly Bergland
Konsehero di peso i salú