E subida di prima di seguro obligatorio di outo ta mustra un biaha mas ku nos mester keda urgi nos gobièrnu pa tin un struktura i vishon konkreto i amplio pa temanan ku ta toka nos konsumidónan. Si e pregunta ta ku nos ke hasi nos tráfiko mas sigur òf nos ke hasi seguro di outo pagabel nos mester hasi nos mes otro preguntanan pa yega na un solushon struktural pa e problema di tantu aksidente den tráfiko, i ku tur e konsekuenshanan manera daño material, gastunan halto pa kompanianan di seguro i mortonan di lamentá.
Un oumento di prima lo sulushoná un problema: esta gastunan ku e kompania di seguro tin pa ku su klientenan. E oumento lo no redusí aksidentenan, lo no redusí mortonan den tráfiko i kisas asta lo oumentá e kantidat di hende ku ta kore insegurá riba nos kareteranan. Fundashon pa Konsumidó a bin ta boga pa un solushon integral di e problema den tráfiko na Kòrsou i a sinta na diferente okashon pa papia ku Asosashon di Tráfiko Sigur Kòrsou (ATSK) ku ta e organisashon ku lo mester tin e enkargo pa konsientisá usuarionan di outo pa, entre otro, mehorá nan komportashon riba kaya. Lástimamente ATSK ya pa añanan kaba no ta risibí fondo òf supsidio di gobièrne pa hasi su trabou manera mester ta. Esaki ta, pa bini ku kampañanan di informashon i konsientisashon pa nos outomobilistanan siña hasi kosnan simpel manera duna direkshon, kore outo di un manera responsabel òf stòp di pasa den lus kòrá manera nada no a pasa. Nos por hisa but pa infrakshonnnan den tráfiko, esei kisas lo kambia kompartashon, si na kada lus di tráfiko tin un polis pará òf un aparato pa saka potrèt di e outonan ku pasa den lus kòrá.
Fundashon pa Konsumidó ta na altura ku Asosashon di Tráfiko Sigur Kòrsou a aserká nos gobièrnu oa medio un karta fechá 18 di yuli 2017 den kua ATSK ta urgi nos minister di Finansa señor Kenneth Gijsbertha pa firma e Landsbesluit H.A.M. pa asina por kuminsá ku instalashon di e fondo di garantia aki, yamá Waarborgfonds, ku pa lei mester a keda instalá pa asina tin un garantia na momentu ku un kontrapartido dal bo outo i no ta sigurá.
Sí nos a komprondé den media ku e Ministerio di Tráfiko, Transporte i Planifikashon Urbano ta trahando riba un proyekto pa pone chep den number di outo. Ku kua intenshon esaki lo bai sosodé pa nos ainda ta un rompekabesa.
Ku Cuaçao and Bonaire Insurance Association, ku ta e asosashon di kompanianan di seguro (CBIA) nos fundashon tin bon kontakto i den pasado resien nos a sinta na mesa pa wak kon por pone e punto di Waarborgfonds riba agènda pa asina despues aserka gobièrnu pa yega na un areglo riba e fondo aki.
Nos fundashon ta di opinion ku nos mester yega na un solushon integral di nos problema di tráfiko. Kampaña di informashon, Fondo di garantia, kòntròl severo, registrashon di outo modernisá, tarifanan hustu, mehoransa di kalidat di kompanianan di seguro kon pa sètel kleim di dalmentu di outo, tur esaki ta ta partinan integral ku mester keda atendé pa nos hisa seguridat den tráfiko na Kòrsou.
Editorial
PRÓLOGO
Subida di Prima
di Seguro Obligatorio
Marc Marshall
Direktor