BO SALÚ
OBRA DI MAN
E arte di mishi I eksplorá kos ta e sentido ku e chikitinnan ta usa mas pa konosé ophetonan. Weganan di traha ku man tambe ta yuda reforsá e espíritu kreativo ku kada mucha tin na e edatnan ei.
Na promé lugá, si nos ta bai hasi obra di mas ku e chikitin, hasi esaki den un espasio ku si e shusha poko, bo por limpia I rùim òp esaki fásil. Tene na kuenta tambe ku mucha chikí gusta hinka kos den boka, pues ta toka nos ku ta mayor/adulto pa ta atento I tur ora presentá ora nos yunan ta den nan fase kreativo. Ta bon pa nos paga tinu na e material ku ta ser usá den produkshon di e ko’i hunganan. Tin ferfnan ku ta 100% natural ku nos por kumpra si bo sa ku bo yu ta gusta hinka kos den boka. Por último, pa bo no tin problema ku e pañanan di bo yu, lo ideal ta pa usa “pintura di awa”, pa bo no tin ku ta man na kabes ora bo mira su obra di arte riba bo su pañanan.
Ki tipo di manualidades bo por hasi?
Formando ku klei
Muchanan ta gusta traha ku klei pa su tekstura, holó, kolo, fleksibilidat ku bo por traha formanan infinito kuné. Ora nos ta bai kumpra klei nos lo ripara ku tin diferente forma I tamaño. Tambe tin ta bin ku forma/moldenan kla ku e mucha por usa pa forma loke e ke. Lo ideal lo ta pa nos traha un pakete chikí den kua e mucha ta haya di tur un poko pa pe por eksplorá . Wak semper pa e klei ta mas safe posibel I natural.
Ket di diseño
Tin mucha ku fo’i chikí bo por nota nan tin un toke artistitiko i kreativo ku nan. Pa e artista chikí ei un “pakete di diseñadó” lo ta ideal. Meskos ku tin e ferf ku ta kita ora bo laba esaki, tin tambe e ferf speshal ku no ta kita. Un ideal leuk lo ta pa duna e chikitin un suèter blanku i lag’é usa e ferf aki pa hunga kuné. Aki tambe ta bon si nos por ta huntu pa guia e proseso mas mihó I limpi posibel. E muchu lo sintié orguyoso di su mes kreashon. Despues por laba esaki I bistié su mes diseño.
KOS DI HUNGA TRAHÁ NA KAS
Resiklahe ta e palabra di moda un par di aña kaba.
E mesun konsepto por wòrdu usá tambe den edukashon I rekreashon di nos yunan chikí. Resiklando nos ta siña e mucha pa kuida nos medio ambiente. Nos por siñ’é kon ta re-usa I kombertí ophetonan den ko’i hunga. Basta no ta material ku tin rant skerpi òf peligroso, nos por laga e mucha mes eksplorá su kapasidat di kambia un opheto den algu diferente.
Pasa prèt ku bo yu na kas por ta masha
fásil, dibertí i edukativo. Ta un kuestion di
duna e chikitin su espasio pa e por konosé su kapasidat di krea I improvisá kosnan nobo kada
dia.