KOMPARÁ I KUMPRA
A kompará produktonan manera betònmat, betòneizer, kokerprofil, hukeizer, Groove-Pine, palu, porta, kozein, pipa di pvc, pvc ‘stukken’, pipa di koper, eternit, panchi di dak, plachi di zenk, plachi’ plafòn, multiplèks, betònplèks, pego i jòint kòmpount.
Ku e komparashon di preis di material di konstrukshon aki Fundashon pa Konsumidó ke asistí konsumidónan den nan kompra di material pa konstrukshon spesialmente durante di e dianan di fiesta benidero.
Fundashon pa Konsumidó ke pone énfasis i alabes remarká ku artíkulonan di konstrukshon ta keda importá for di diferente merkado i pais. Esaki ta pone ku e kalidat di materialnan ta diferente. E echo aki por tin influensia riba e diferensianan di preis entre e diferente artíkulonan optenibel den hartwernan aki na Kòrsou. Ta importante pa abo komo konsumidó tene esaki bon na kuenta.
Sea alerta i kumpra konsiente
Analisando e komparashon di preis nos por konkluí ku no ta tur material di konstrukshon ta optenibel na tur hartwer. Di e 162 materialnan ku nos a pre selekta, Kooyman tin un kantidat di 122 material. Marchena Hardware tin 120 i Building Depot tin 109.
Tambe nos por konkluí ku tin hartwer ku ta skor mihó ku otro den sierto kategoria. Aki nos ta duna algun ehèmpel. Segun e lista di anotashon di preis, si ta palu di skaf bèrdè bo mester, Building Depot ta e hartwer ku tin mas di e produktonan aki na un mihó preis. Si bo ta buskando eternit ‘asbest vrij’, nos ta konsehá pa hasi Gomez Enterprices un bishita.
Tambe nos a nota di algun diferensia di preis entre e diferente hartwernan. Por ehèmpel Aluminium Trapazium di 10 meter ta kosta na Kooyman fl. 429.99 i na Gomez Enterprices esaki ta kosta fl. 249.95. Un otro material ku tin un diferensia di preis grandi na algun hartwer ta: Kozijn Hardhout (83 cm). Kooyman tin esaki pa fl. 119.99 i na Gomez Enterprices esaki ta kosta fl. 245.00.
Lista di anotashon di preis
Pa fasilidat Fundashon pa Konsumidó a pone e diferente materialnan di konstrukshon den un tabèl, di moda ku kada konsumidó por haña un bista mas amplio di e surtido i preis ku e diferente establesimentunan ta ofresé. Por pidi e lista di anotashon di preis aki tambe via meil: [email protected] òf tuma kontakto ku nos via telefòn 462-6666. Tambe bo por wak e tabèl riba nos wèpsait: www.fundashonpakonsumido.org.
Durante di e periodo di 25 di òktober pa 31 di òktober 2017, Fundashon pa Konsumidó a bishitá 7 diferente hartwer ku ta bende material pa konstrukshon na Kòrsou i a anotá i kompará preisnan den e sektor aki. E hartwernan ku Fundashon pa Konsumidó a bishita ta: Kooyman, Gomez Entrerprises, Marchena Hardware, Ferreteria Skèrpènè, Dijtham, Building Depot i Staal Antillen. Na e hartwernan aki a inventarisá preis di 162 tipo di produkto i material pa konstrukshon.