Segun un investigashon ku a keda hasí na Hulanda ta duna di konosé, hopi mayor ta duna nan yunan un ‘smartphone’ for di un edat relativamente yong.
Ta asina ku 5 porshento di muchanan di 4 aña di edat ya tin un telefòn pa sea komuniká ku nan mayornan òf pa hasi uzo di weganan edukativo. Apesar ku mayornan ta mira e importansia aki, tòg nan ta konsiente di e peligernan ku nan yu por eksperensiá atrabes di un telefòn sabí. Segun e investigashon, 89 porshento di mayornan ta preokupá pa loke nan yunan por topa riba e mundu digital. ‘Cyberbullying’ i ‘Sexting’ ta e dos peligernan ku mas e mayornan ta preokupá i konsiente di dje.
Si bo yu menor di edat tin un ‘smartphone’ òf ‘tablet’, kontrolá esaki regularmente. Tene na kuenta ku e aparato aki mester fungi komo metodo pa eduká i rekreá. Pero kòrda pone un balansa entre e weganan virtual i esunnan ku tradishonal. Awendia nos ta bibando den un mundu sibernétikamente avansá, kual ta pone ku nos yunan ta bira vulnerabel pa e teknologia ku tambe ta keda avansá konstantemente.
Algu importante ku por kontrolá i tambe prevení peligernan kontra di nos chikitinnan ta: regla. Dor di pone un lista di regla pa uzo di ‘smartphone’ òf ‘tablet’, bo yu lo kustumbra i lo separá loke por i loke no por. Esaki ta evita ku bo yu ta bira adikto na su ‘smartphone’ òf ‘tablet’. Pues, no tin nada robes den regalá un mucha e aparatonan aki, basta abo komo mayor por kumpli ku e responsabilidat ku esaki ta eksiguí.
MI TA MENOR DI EDAT
I MI TA DOÑO DI UN SMARTPHONE