Fundashon pa Konsumidó den su afan pa informá konsumidónan di Kòrsou, resientemente a hasi un komparashon di paketenan básiko di televishon digital na e kompanianan: Directv, Flow, TDS I Tres Network. Meta di e komparashon aki ta pa informá i konsientisá konsumidónan, asina kada un konsumidó por tin un bista amplio for di kiko nan por skoh’é of si nan ta interesa pa ‘switch’ di kompania.
Asina aki FpK ta fasilitá nos konsumidónan tambe den e proseso di skohe e pakete básiko ku mas ta kuadra ku nan nesesidat.
Fundashon pa Konsumido a hasi anotashon di preis, kantidat di kanal i e kondishonnan ku kada kompania ta ofresé den su pakete básiko.
Resultadonan di e anotashon aki ta indiká ku TDS tin e pakete básiko di mas barata kuminsando for di e montante di ANG 68.90 pa luna i e mester wòrdu paga delantá. E pakete básiko aki ta enserá 89 kanal di tv, 22 radio lokal & 52 kanal stringray. Bo ta haña un kontrakt di 1 aña i bo tin 1 luna di tempu pa tèrminá esaki, dado kaso bo no ke hasi uzo di nan servisio mas.
Na segundo lugá tin Directv ku su Silver Package ku e montante di ANG 78.23 pa luna. Den e pakete básiko aki bo ta haña 77 kanal (52 video, 10 spòrt & 15 mundial) mas 37 oudio kanal + DVR (record, pouze, rewind live TV). Na Directv bo tin 1 aña kontrakt, (si bo ke stòp promé ku e kontrakt kaba bo mester paga 3X e montante pa luna) despues bo ta sigui gewon ku un open kontrakt na esei si bo tin 1 luna di tempu pa tèrminá e kontrakt. Na directv bo ta paga adelantá pues pre-pago. E instalashon ta pòrnada i bo ta hañ’é bòks pega denter di 4 pa 5 dia.
Pakete básiko di televishon Digital
KOMPARÁ I KUMPRA