Den nos edishon anterior, nos a amplia riba un kaso kaminda e konsumidó, un kumpradó di un outo ku a resultá defektuoso a hiba bendedó di e outo i e kompania di seguro ku ta duna garantia dilanti. Korte a rechasá e demanda ku e konsumidó tabatin kontra di e kompania di seguro, pa motibu ku tabatin tur indikashon ku e outo tabata unu defektuoso promé ku e kompra. Segun Korte, e kompania di seguro A tabatin rason di ninga di kubri e gastunan di reparashon ku e konsumidó tabatin.
Seguidamente Korte a trata e demanda ku e konsumidó tabatin kontra di e komersiante ku a bend’é e outo. Durante e kaso, e komersiante a trese entre otro pa dilanti, ku e no tin obligashon di paga daño i perhuisio na e konsumidó, pa motibu ku e konsumidó no a mand’é un karta di inkumplimentu manera lei ta stipulá, promé ku entamá e kaso. E konsumidó di su banda a splika ku mirando tur e sirkunstansianan di e kaso, mandamentu di karta di inkumplimentu por a keda atras. Na promé lugá pasobra e konsumidó for di un komienso a pone e komersiante na altura di tur e desaroyonan i akontesimentunan rondo di e kaso. Banda di esei e komersiante a keda pone na altura por eskrito ora e kompania di seguro A a ninga di kubri e gastunan di reparashon, ku e konsumidó tabatin. Sinembargo, despues di esaki e komersiante no a ofresé e konsumidó pa drecha e outo boluntariamente.
Tur esakinan i mas a hiba Korte na e konklushon ku e mandamentu di karta di inkumplimentu, por a keda atras bou di e sirkunstansianan menshoná. Ku esaki e konsumidó ta haña rason serka Korte pa ku su demanda kontra di e komersiante. Sí t’asina, ku Korte a evaluá e montante di gastunan ku a ser hasí pa drecha e vehikulo i despues a baha esaki na un montante ku Korte a haña rasonabel. Korte a honra tambe e otro petishonnan di e konsumidó i a sentensiá e komersiante na paga tur gastu ku e konsumidó tabatin durante di e proseso hudisial.
Finalmente nos por konkluí, ku apesar ku pa lei mandamentu di karta di inkumplimentu den un proseso hudisial ta hopi importante, bou di sierto sirkunstansianan esaki por keda atras. Sinembargo, nos ta konsehá pa semper manda un karta di inkumplimentu, ya asina bo ta sigur ku bo demanda no ta keda rechasá na momentu ku bo yega Korte.
Artíkulo kortesia di abogado Mr. Rainey Conquet