NOTISIA
Ofisina Sentral di Statistik (CBS) Kòrsou a hasi un enkuesta durante lunanan di aprel te ku yüni 2017 den kual a midi kon leu kasnan di famia i personanan aki na Kòrsou tin akseso na Teknologia di Informashon i Komunikashon. E resultadonan di e enkuesta di ICT i Media aki a sirbi tambe pa kompará Kòrsou ku otro paisnan riba tereno di teknologia.
Resultadonan
ICT
Despues di a kompará e resultadonan, CBS a analisá i kalkulá e ICT Development Index (IDI) di Kòrsou. E resultado ta indiká ku Kòrsou tin un skor di 6.93. Esaki ta pone nos den e tòp 50 paisnan riba e lista internashonal. Den region, Kòrsou ta na di tres lugá. Pa mas informashon di IDI internashonalmente por bishitá e wèpsait www.itu.int.
Internet
Pa loke ta trata internèt, 64.5% di e kasnan di famia na Kòrsou tin internèt. 51.3% di e kasnan di famia ku no tin internèt a indiká ku e motibu di kon nan no tin internèt ta e gastu haltu di internèt ku tin aki na Kòrsou.
Media
Pa loke ta uso di media, e poblashon di Kòrsou (6 aña i mas grandi) 68% ta tende radio, 84.7% ta wak televishon i 54.4% ta lesa korant. No tin masha variashon si nos wak e sifranan aki pa sekso pero e variashon ta bini ku edat. Hóbennan ta skucha ménos radio ku personanan di 25 aña òf mas. Esaki ta mesun kos pa korant pero na televishon tin mas hóben ta wak televishon ku personanan di edat.
Medionan sosial tambe ta popular, ku un uso di 70.3%. E medionan sosial mas popular ta Whatsapp i Facebook. Esaki ta wòrdu usa pa keda den kontakto ku famia i amigunan. Di e 30 porshento ku no ta usa medionan sosial, e motibu ta ku nan no ta gusta e tipo di kontaktonan aki.
Por último
Riba e página inisial di wèpsait di CBS (www.cbs.cw), tin mas informashon (den forma di tabèl) di e promé resultadonan disponibel. Mas den kabamentu di 2017 CBS lo tin un publikashon mas ekstenso di e resultadonan di e enkuesta akí.
INTERNET TA MUCHU KARU
Mas ku mitar di kasnan na Kòrsou no tin internèt pa motibu di preis haltu di internèt
fuente: