PRÓLOGO
E aña aki atrobe Fundashon pa Konsumidó ta organisá su Kurso di Presupuesto grátis. Ya pa 6, i ku mas di 140 partisipante kada aña, nos Kurso di Presupuesto a sa alkansá i eduká sentenáres di nos hendenan, kreando konsumidónan mas krítiko i konsiente di e poder di nos pòtmòni.
Nos meta pa e próksimo temporada ta pa amplia nos kampaña di informashon i krea mas kanal pa alkansá, eduká i konsientisá nos konsumidó, di chikí te grandi. Nos lo intensivá nos trabounan riba e área aki i purba di aserká kada grupo di ophetivo di un forma diferente. Diferensiando gruponan di ophetivo ta duna nos e oportunidat pa informá kada grupo di e forma ku mas mihó informashon ta yega serka kada grupo spesífiko.
Banda di mantené e hisa kalidat di nos Kurso di Presupuesto, nos lo ke yega na nos mucha- i hóbennan pa nan siña kon pa anda ku sèn. For di chikí nos muchanan mester ta siña di ta konsiente ku sèn no ta keda presentá riba un bandeha di plata. Lòs for di e echo ku nos tur mester traha pa tin un entrada, tambe ta importante pa loke bo gana, bo gasta na un manera responsabel i ademas nos mester siña traha dam pa warda awa.
Tambe nos fundashon lo sigui ku su kursonan ku nos lo ofresé kompanianan pa di un forma dirigí den un kompania duna kursonan finansiero na trahadónan. Esaki semper di un forma personalisá pa e situashon di e kompania i su trahadónan. Kolaborando asin’aki ku sektor privá i gobièrnu pa asina edukashon finansiero yega na alkanse di un públiko ainda mas grandi i kreando espasio pa nos fundashon generá algu di entrada pa por hasi tur e trabounan ku Fundashon pa Konsumidó tin komo meta pa alkansá.
Den kuadro di esaki, nos lo intensivá i strukturá ainda mas nos kampañanan di informashon den medionan sosial. Banda di nos programa radial Konsumidó Konsiente, di tur djaweps mèrdia 2 or na Radio Hoyer i e revista digital Konsumidó Alertá aki, nos lo start pa e periodo di fin di aña ku un kampaña di konsientisashon ku e meta pa kada ken analisá nan komportashon finansiero. Bo ta konsiente di kuantu sèn bo ta gasta na, por ehèmpel paña, fastfood òf bo kompra di komestibel tur luna?
Nos ta konvensí ku ta sumamente importante pa abo komo Konsumidó sa kiko ta bo gastunan, traha bo presupuesto, tene bo mes na dje pa asina bo por biba un bida finansiero saludabel. Pues keda pendiente pa e videonan ku lo keda transmití na radio i televishonnan lokal i sigur tambe riba nos wèpsait i via nos kanalnan di YouTube i Facebook den e periodo di òktober, novèmber i desèmber. Den e edishon aki di Konsumidó Alertá bo por mira un video di promoshon di e kampaña 'Kuantu bo ta gasta' ku lo start próksimamente. A yega ora pa bo ta ainda mas responsabel! Bo tambe ta kla?
Kuantu bo ta gasta?
Editorial
Kampaña di konsientisashon di komportashon finansiero
Marc Marshall
Direktor