KOMPARÁ I KUMPRA
Awendia Facebook ta e media sosial mas popular na mundu pa sosialisá, kompartí, merkadeá i komuniká. Durante añanan, Facebook a bini ta desaroyá i inová pa asina brinda e usuario un plataforma digital optimal. Aparte di ta un plataforma pa e usuario komun i koriente, aktualmente Facebook ta brinda kompanianan tambe e espasio pa yega mas serka di nan klientenan.
Komparashon di Preis
BOTIKA
Resientemente Fundashon pa Konsumidó a hasi komparashon di preis di produktonan optenibel den botika. Durante di e periodo di 6 di sèptèmber pa 12 di sèptèmber 2017, Fundashon a bishitá un total di 28 botika i a kompará preis di 78 produkto. E produktonan aki ta repartí den diferente kategoria. Por ehèmpel: awa pa higiena pa boka, pasta di djente, habon pa baña, gèl pa baña kuné, puiru, deodorante, toaya femenino, pomada, krema pa kurpa, shampo/’conditioner’, ‘relaxer’ pa kabei i pintura, ‘remover’ pa uña, krema pa feita i tambe ‘splash lotion’.
E tres botikanan ku mas produkto na preis ekonómiko
Ku un total di 30 produkto di e 78 produktonan ku a keda pre selektá, Botika Groot Piscadera a resultá di ta e botika ku mas produkto na un preis mas ekonómiko. E di dos botika ku mas produkto na un preis mas kumbiniente resultá Botika NOVO, ku 22 produkto. Botika Cerito ta na di tres lugá ku un kantidat di 18 produkto na un mihó preis. Ta bon pa menshoná ku e resultado aki ta basá riba e anotashon di preis ku a tuma lugá den e periodo di 6 di sèptèmber pa 12 di sèptèmber 2017. Pues tene na kuenta ku e preisnan por varia ku tempu.
Botikanan mihó surti
E botika mihó surtí a base di e komparashon di preis aki a resultá Botika Groot Piscadera, ku un total di 66 produkto di e 78 produktonan pre selektá. Na di dos lugá a resultá Botika Cerito ku 62 produkto den rèki. Botika Zuikertuintje ta na di 3 lugá ku un kantidat di 59 produkto. A base di e produktonan pre selektá, por mira ku Botika Groot Piscadera i Cerito ta e dos botikanan ku tin un preis mas ekonómiko i tambe mihó surti.
Diferensia di preis
Tin un diferensia notabel entre e preis di mas ekonómiko i esun di mas karu pa loke ta trata algun produkto. Por ehèmpel un bòter di Listerine Original di 500 ml ta kosta fl.11,61 na Botika Stakamahachi, pero na Botika Juliana i Botika Santa Rosa esaki ta kosta fl.16,66. Aki tin un diferensia di preis di fl. 5,05. Un produkto ku tambe tin un diferensia di preis notabel ta puiru Ammens (311gr). Esaki ta kosta fl. 10,99 na Botika Cerito, Groot Piscadera i NOVO. E mesun puiru aki ta kosta fl. 16,55 na Botika UNION, kual ta un diferensia di preis di fl. 5,65. E produkto di pintura Clairol Textures & Tones Natural Black ta kosta na Botika Brion fl.10,74. Na Botika Mampuritu e mesun produkto aki ta kosta fl.18,39, kual ta un diferensia di preis di
fl. 7,65.