Djaluna 18 di sèptèmber entrevistadònan di Ofisina Sentral di Statistik (CBS) a sali i bai den vèlt den kuadro di Enkuesta konteo di bibienda pa konta bibiendanan ku ta habitá, bashi óf ku ta den konstrukshon. Tambe e enkuestadonan lo konta edifisionan ku tin un funkshon komersial. E enkuesta aki lo dura te ku 15 di desèmber pròksimo.
Meta di e enkuesta aki na prome lugá ta pa haña un bista di kuantu bibienda (potensial) tin na Kòrsou. Na di dos lugá lo haña un bista tambe di e repartishon espasial di edifisionan komersial na Kòrsou.
E datonan ku CBS lo risibí for di e enkuesta aki huntu ku e resultadonan di Enkuesta di bibienda di 2016, Kòrsou por haña un mihó bista di e situashon di demanda i oferta riba e merkado di bibienda na Kòrsou.
E enkuesta aki ta diferenshá for di otro enkuestanan ku CBS sa organisá dor ku e enkuestadó no mester tene un entrevista ku e personan den un kas. Pero ta kolektá dato dor di opservashon di e bibienda/edifisio. Solamente den kasonan difisil e enkuestadònan por pidi e doño di kas pa mas informashon. Den e kaso aki e enkuestadó di CBS mester identifiká su mes ku u badge ku nan informashon personal/potrèt/logo di CBS i firma di e direktor di CBS.
Por yama ofisina di CBS semper pa verifiká ku tin un enkuesta di CBS na e momentunan aki andando i pa kontrolá e nòmber di e enkuestado. E number di telefon di CBS pa hasi esaki ta : 839 2350.
Resultadonan di e enkuesta aki lo ser publiká den 2018 den medionan di komunikashon i riba su website www.cbs.cw.
Konteo di bibienda 2017 organisá dor di CBS
ENKUESTA