IMPOSIBEL
PAGO OUTOMÁTIKO VIA BANKO
Tur negoshante mester kumpli kun'é
Si bo ke hasi un pago outomátiko periódikamente, sea ta pa siman, luna òf aña, tin dos manera pa hasi esaki. Ku un ‘standing order’ òf un direct debit. Hopi di nos ta brua e dos sistemanan aki dor di otro. Esaki ta komprendibel. E diferensianan ta sutil pero tòg importante. Laga nos kuminsá na splika e diferente métodonan aki pa hasi un pago outomátiko.
Na promé lugá tin standing order òf automatische overboeking na Hulandes. Standing order ta un instrukshon na bo banko hasi un pago periódikamente pa un terser partido. Esaki bo por hasi via online banking òf personal na bo banko (tene na kuenta ku bo banko por kobra bo un tarifa si bo hasi esaki personal na banko). Standing orders ta bon pa usa na momentu di hasi un pago di un montante fiho periódikamente. Pero si e montante ta varia tur luna, manera bo kuenta di awa òf lus por ehèmpel, e ora ei standing order no ta e opshon mas práktiko. Bo mes lo tin ku (laga banko) adaptá kada luna e montante. I si bo ke stòp e pagonan esaki tambe semper bo por hasi dor di duna bo banko un instrukshon.
Direct debit ta duna bo e espasio pa paga sumanan variabel na interval di tempu variabel sin ku bo mester hasi algu. Esaki ta hasi fásil pa paga kuentanan ku por ehèmpel ta kobra segun uso, manera ya bisa bo kuenta di awa. Un direct debit ta un instrukshon di abo na bo banko ku ta outorisá un terser partido pa kita sèn for di bo kuenta na momentu di paga bo resibu. Bo ta duna outorisashon dor di yena i firma un formulario di mandato na e kompania. Una bes bo duna e outorisashon aki e kompania por kita sèn sin mas for di bo kuenta pa pago di resibu òf faktura ku abo debe e kompania. Ku direct debet tambe bo ta sigur ku bo pagonan ta keda hasí na tempu tur luna for di bo kuenta di banko tanten bo tin saldo riba bo kuenta. Otro siguransa ku bo tin komo kliente di banko ta ku bo tin e derecho pa drai bek òf
kanselá e direct debit
sin mas.
Despues di e interupshon di servisio di internèt i telefòn di parti di Scarlet a surgi seka hopi di nos konsumidónan un insertidumbre grandi tokante pagonan outomátiko for di nos kuentanan di banko. Fundashon pa Konsumidó ke kita e inseguridat aki. Si bo ke hasi òf tin un pago outomátiko lesa e guia aki pa ta na altura di e diferente métodonan ku banko ta ofresé i kiko ta e bentahanan di kada tipo di transakshon.