Konfiansa di konsumidó ta algu sumamente importante pa tin un merkado ekonómiko sostenibel i duradero. Sin e konfiansa aki e konsumidó lo duda i kuestioná kada bes kalidat i kontenido di un produkto. Di un banda ta deber di e bendedó pa duna siguransa di su produkto ku e ta bende. Al final, si ami no ta konfia, mi no ta kumpra. I si ami no kumpra e bendedó no ta bende. I si e bendedó bende e no ta traha su sèn. Esei ta e poder ku nos tin komo kumpradó, e poder di nos pòtmòni!
Konfiansa ta e palabra klave den komersio. Konfiansa entre komersiantenan, konfiansa di e konsumidó. Riba nivel internashonal konfiansa ta basá riba strukturanan di standart-, konvenio-, kódigonan i regulashon diseñá pa sigurá ku na momentu ku bo kumpra algu,komo komersiante òf konsumidó, bo risibí eksaktamente loke bo a spera. Pa e standartnan, konvenionan i kódigonan aki tin peso i balor, nan mester keda deliñá i implementá di un forma rígido i konsistente pa ta duna un i tur envolví un nivel haltu di konfiansa den e resultado. Pa garantisá e konsistensia riguroso aki e konsepto di un Infrastruktura Nashonal di Kalidat a surgi.
1. Un un Infrastruktura Nashonal di Kalidat ta konsistí di sinku komponente:
Standarisashon, tèst, midishon, sertifikashon i akreditashon.
2. Standarisashon ta krea standartnan nashonal i internashonal ku ta spesifiká kon produktonan ta keda produsí di un forma ku ta mutuamente aseptabel pa tur partido.
3. Tèstmentu i midimentu ta e implementashon di standartnan i spesifikashonnan pa sigurá valides i konsistensia.
4. Sertifikashon tei pa sigurá ku esnan ku ta hasi uso di e standart- i kódigonan ta hasi esaki na e manera korekto.
5. Akreditashon tei pa sigurá ku esnan ku ta hasi tèst, inspekshon i duna sertifikashon ta kompetente pa hasi esei.
Pa un pais den desaroyo, un Infrastruktura Nashonal di Kalidat ta e fundeshi pa desaroyo ekonómiko i alsa prosperidat.
Komishonnan i
Kolegionan di Supervishon
Editorial
PRÓLOGO
Marc Marshall
Direktor
E BALOR
DI UN INFRASTRUKTURA NASHONAL DI KALIDAT