Fundashon pa Konsumidó ta kere ku awor si awa a pasa hariña i ta eksigí, di tantu supermerkado komo minimarketnan mas transparensia pa ku nos konsumidónan. Nos ke rekordá no solamente doñonan di supermerkadonan pero tambe nos konsumidónan, ku segun nos leinan, tur produkto di konsumo mester ta debidamente identifiká ku un etikèt ku ta menshoná e.o. nòmber di e produkto, importadó i fecha di vensementu di e produkto. Den mesun rosea nos ke aklará un biaha mas ku den e kadena di informá komunidat tokante produkto i servisionan di konsumo, Fundashon pa Konsumidó ta enkargá ku e parti di anotashon i komparashon di preis di produktonan den supermerkado, minimarket i tokonan, pa asina informá komunidat unda ta mas ekonómiko pa kumpra. E parti di kontròl di kalidat di produktonan ta den man di e tim multi-disiplinario. Nos Fundashon ta traha sí den estrecho koperashon ku MEO i na momentu ku nos konstatá kualke iregularidatnan den kondishon i/òf preis di un produkto, nos ta notifiká esaki na MEO, spesífikamente sr. Ronny Cornelis i su team.
Fundashon pa Konsumidó ta spera ku awor mas ku nunka, nos konsumidónan lo bira mas krítiko i konsiente, di tantu nan pòtmòni komo nan salú. No tin espasio(mas) den nos komportashon pa keda ketu i laga kos pasa bai, pensando ku “mi ta spar 2 plaka paso ainda e kalidat ta bon”. Nos mester realisá ku bos di un konsumidó tin poder.
Nos mester eksihí ku produktonan kaduká mester ta for di rèki. Punto!
Temporada di kontròlnan na toko i minmarketnana nos no a tende niun miembro di SUVEKO vosiverá ku e kontròlnan aki i e prosedura siguí, no ta bon. Dikon awor si? Fundashon pa Konsumidó ta spera ku e kontròlnan aki lo sigui den mas sektor, pa asina komunidat por ta sigur ku e ta pagando pa un produkto di kalidat.
Nos ta spera tambe ku awor si lo bini sanshonnan fuerte pa establesimentunan ku konsientemente ta bende produktonan kaduká i ku no tin fecha di vensementu visibel, manera tin stipulá den nos ‘warenlandsverordening’, sigur ora e infrakshon ta trata produktonan manera karni, piska, belèg etc. Tene na kuenta ku un konsumidó por mira fecha di vensementu riba un bleki di berdura, un paki buskuchi, pero produktonan manera karni, belèg, fruta e ta kumpra esaki a base di e konfiansa ku e tin ku e establesimentu ta bende kos na drechi i di kalidat. Konfiansa ta bal oro, pues no ta algu ku supermerkadonan mester neglishá.
Na nos konsumidónan, sea mas alerta i eksigente. Promé ku bo kumpra un produkto, kontrolá su fecha di vensementu, i si ta karni, piska òf belèg, no tene miedu pa hole, primi òf studia e produkto mas mihó. Si bo tin kualke keho basá riba iregularidat di un produkto di konsumo òf kualke otro produkto, tuma kontakto ku Fundashon pa Konsumidó na number di telefòn 462-6666 òf via e-mail [email protected]. Tambe por pasa serka nos na ofisina na De Ruyterkade 53, Punda.
Último simannan nos tur por a tuma nota ku e diferente departamentunan enkargá ku kontròl i kalidat di Ministerio di Asuntunan Ekonómiko i di GGD ta ehersiendo kontròlnan rutinario na diferente establesimentunan ku ta bende komestibel i kuminda prepará. E akshonnan aki por konta 100% ku nos apoyo i sosten mirando ku tur loke e tim multi-disiplinario ta hasi ta den kuadro di nan tareanan pa kontrolá ku tur establesimentu ta mantené su mes na reglanan stipulá.
MEO tin 100% sosten
di Fundashon pa Konsumidó