KOMPARÁ I KUMPRA
Samsung Galaxy S8 i S8 plus ta e lastu vershon di telefòn di e marka Samsung. Esaki ta un di e modèlnan mas avansá ku e kompania a produsí. Konsumidónan, prinsipalmente e uzadónan di ‘Android’ ta sumamente satisfecho ku e produktonan aki.
Apesar di e akohida ku e dos modèlnan aki a risibí, ta bon pa menshoná ku nan ta muchu mas sensibel ku e modèlnan anterior. Un kaida por resultá komo destrukshon inmediato di bo pantaya. Esei ta loke investigashonnan hasí pa Consumentenbond ta duna di konosé.
E investigashon aki a keda ehekutá huntu ku algun organisashon mas, establesé na Oropa. Pa medio di e asina yamá ‘valtrommel’, kual ta un mashin ku ta keda drai. Ámbos telefòn a keda introdusí den e mashin aki i despues di 25 rònchi, tur dos modèl tabata kibrá. A hasi e mesun investigashon aki ku iPhone 7, Huawei P9 i e Galaxy S7. Despues di e 25 rònchinan, e telefònnan aki tabata den basta bon estado kompará ku e modèlnan nobo di Samsung.
Si ba kumpr'é, kuid'é!
Paga tinu..!!
“E telefònnan Samsung Galaxy S8 i S8 plus ta modèlnan super bon”. E bosero di Consumentenbond ta duna di konosé. “ Pero konsumidónan mester ta konsiente ku e aparatonan aki ta hopi frágil.” Fundashon pa Konsumidó ta konsehá pa protehá e telefònnan aki bon. Hopi bia un bon ‘cover’ òf ‘case holder’ por ta basta karu. Pero mira esaki komo un invershon ku lo garantisá durashon di bo telefòn.