KOMPARÁ I KUMPRA
E vershon ménos pisá
Facebook Lite
Awendia Facebook ta e media sosial mas popular na mundu pa sosialisá, kompartí, merkadeá i komuniká. Durante añanan, Facebook a bini ta desaroyá i inová pa asina brinda e usuario un plataforma digital optimal. Aparte di ta un plataforma pa e usuario komun i koriente, aktualmente Facebook ta brinda kompanianan tambe e espasio pa yega mas serka di nan klientenan.
Segun sra. Flavina Wanga (Social media expert i direktora di Crab Social) ta splika Fundashon pa Konsumidó, for di e total di usuarionan di internèt aki na Kòrsou, 70% ta hasi uzo di Facebook. Esaki ta un porsentahe basta haltu ku ta bisa hopi di e komportashon digital di nos konsumidónan.
Resultado di investigashonnan internashonal ta mustra ku hopi ta esnan ku ta uza Facebook via di nan ‘Smartphone’. Mirando e diferente posibilidatnan ku Facebook ta brinda, nos mester ta konsiente di e kantidat di data ku esaki ta gasta. Pues si bo no ta den disposishon di un ‘WiFi’, wakmentu di video òf potrèt riba Facebook por gasta bo data hopi lihé.
Teniendo esaki na kuenta, Facebook a introdusí un aplikashon ku yama Facebook Lite. Esaki ta un aplikashon spesial pa e sistema di Andriod i ta funshoná perfektamente na momentu ku e señal di ‘WiFi’ no ta unu fuerte òf na momentu ku bo no tin sufisiente data.
Un di e benefisionan di e aplikashon aki ta e echo ku su kapasidat ta ménos ku 1MB. Na momentu ku bo instalá esaki, solamente 2.82MB di e espasio di bo telefòn ta keda okupá. Esaki ta un diferensia basta grandi for di e vershon original di Facebook, kual ta tuma 195MB na espasio di bo telefòn.
E resolushon di potrètnan riba e aplikashon aki ta sumamente abou.
Si bo ke wak potrèt na un kalidat
mas haltu, bo tin ku djis klek riba
e potrèt i lo bo nota e diferensia. Ounke e
aplikashon aki ta unu trahaa kompletamente ‘from scratch’, visualmente e ta similar na e vershon original di Facebook. Si bo ke manda mensahe pa un otro usuario, bo mester tene na kuenta ku tin algun kambio den e sistema di ‘Messenger’. Por ehèmpel, via Facebook Lite no tin posibilidat pa manda ‘sticker’ ni e posibilidat pa manda oudio i video.
Pues, bo ke spar bo data na momentu ku bo ta riba kaya, pero tòg bo ke keda konektá riba Facebook? Facebook Lite ta e opshon! E aplikashon aki ta optenibel via Google Play store.Si dado kaso bo no por haña Facebook Lite via Play Store, subi Google i download e via e wèpsait “APK Mirror”.
Fundashon pa Konsumidó ke kòrda bo riba e peligernan di media sosial. Ta sumamente importante pa bo analisá kiko bo ta eksponé riba retnan sosial. Na ingles nan sa bisa: ‘Social media can make you or break you’. Den kuadro di esaki nos ta brinda bo algun fragmento oudiovisual, ku tepnan sumamente balioso pa abo ku ta aktivo riba e mundu digital. Skucha i mira tepnan di sr. Franklin Sluis (direktor di Bureau Telecommunicatie en Post), sra. Flavina Wanga (direktor di Crab Social) i tambe sr. Leonardo de Abreu Ladeira (Policy Advisor di Bureau Telecommunicatie en Post).