Balor di un
Un di e leinan ku ta keda usá pa por kondusí e kontrolnan ta e asina yamá Warenlandsverordening. Meta di e lei ta pa stipulá reglanan pa ku produkshon i benta di alimento, esaki na interes di nos salubridat nashonal. Gobièrnu ta haña pues e outoridat pa pone reglanan spesífiko enkuanto kalidat, volúmen, karakterístikanan, produkshon, transporte, registrashon, empaketashon, uso di aditivo òf pestisida, higiena, en fin tur pero tur aspekto di proseso di un produkto te na e momentu ku nos kumpr’é. Tambe e lei ta stipulá ke mester tin un Komishon di Konseho (Adviescommissie Waren) ku ta konsistí di representantenan di gobièrnu, produktor/importadó i tambe di konsumidónan ku ta duna gobièrnu konseho riba tur loke ta trata nos alimentashon. E Komishon di Konseho aki a funshoná pa algun aña i ya pa hopi aña no a keda aktivá mas pa gobièrnu. Realidat aktual ta hasi re- instalashon di e komishon aki un nesesidat grandi. Fundashon pa Konsumidó ta urgi nos gobièrnu pa tuma pasonan nesesario pa e komishon aki por hasi su trabou.
Un punto hopi importante ta e loke e lei ta prohibí. E ta prohibí pa un i tur bende alimento pa kome òf bebe ku no ta apto pa konsumo i ta pone salubridat i seguridat di nos hendenan na peliger. E prohibishon aki tambe ta bálido otro produktonan no alimentisio ku por afektá nos salubridat i seguridat.Tambe ta prohibí, entre otro, pa bende produkto di un forma ku ta violá reglanan di etiketa stipulá den e Landsbesluit Etikettering van Levensmiddelen.
Landsbesluit Etikettering van Levensmiddelen ta spesifiká loke kada bendedó mester pone riba e etikèt di su produkto. Ku ta entre otro: un lista di ingrediente, e kantidat di kada ingrediente òf kategoria di ingrediente, e kontenido neto, e fecha di vensementu òf fecha di último konsumo, instrukshon pa usa òf warda e produkto, datonan di e fabrikante i importadó, siudat di orígen di e produkto, e grado di alkohòl den e produkto, e pakete di produkshon i informashon tokante uso di gas di empake. Kada un di e spesifikashonnan aki ta keda ekstensivamente spliká den e landsbesluit aki.
Sigur un di e spesifikashonnan ku últimamente ta tantu den notisia ta fecha di vensementu.
E menshon di e fecha di vensementu mester konsistí di palabranan manera "ten minste houdbaar tot" sigui pa un fecha ku si pas den e tempu ku e produkto lo keda ku e karakterístikanan di e produkto.
E fecha mester ta konsistí di un sekuensia di dia, luna i aña òf e sekuensia ku den e pais di orígen ta usual. Pa entre otro berdura fresku, diferente sorto di biña, likùr, bibidanan alkohóliko, pan, binager, salu i suku tin eksonerashon pa pone fecha di vensementu.
E último fecha di konsumo ta keda usá pa kos di kome i bebe ku for di mira mikrobiológiko por daña hopi lihé i konsekuentemente por bira un menasa direkto pa salubridat hopi lihé despues di kumpra. E menshon mester konsistí di palabranan manera "te gebruiken tot" sigui pa un fecha promé ku kua e produkto mester keda konsumí pa prevení peliger di konsumo.
Si un bendedó òf importadó violá sierto artíkulonan di e Warenlandsverordening esaki ta kondenabel. Si e violashon keda hasí konsientemente e echo aki por ta kastigabel ku un multa te na un máksimo di un mion florin òf kastigu penal di 4 aña. Si e echo kastigabel sosodé di un forma inkonsiente un multa te ku 100 mil florin por keda imponé òf un kastigu di prizòn di un aña. Si e komersiante opstruí kualke investigashon di outoridat responsabel e por haña un kastigu di prizòn di 2 luna máksimo òf un multa di mil florin.
Risibí athunto e Warenlandsverordening i Landsbesluit Etikettering van Levensmiddelen pa tuma nota di mas informashon tokante leinan aki.
Fundashon pa Konsumidó ta aploudí e inisiativa di gobièrnu pa hasi kontrol di nos merkado mas struktural frekuente i transparente. For di leinan di labor, impuesto pero tambe preisnan máksimo i situashon di higiena i kondishon i kalidat di produktonan den rèki, tur ta keda kontrolá i si tin violashon di lei, produktonan ta keda konfiská i destruí.
WARENLANDSVERORDENING
Splikashon di