IMPOSIBEL
Apesar ku Banko Sentral na 2015 kaba a saka un disposishon di di Interes Anual Efektivo (APR) ainda tin kompanianan ta hasi propaganda pa duna fiansa òf kumpra riba krédito sin splika e konsumidó kuantu e ta paga pa su fiansa.
Na yanüari 2015 Banko Sentral di Kòrsou i Sint Maarten a emití e asina yamá Disposishonnan di APR, ku ta un disposishonnan Tokante di Publikashon di Informashon di Preis di Krédito di Konsumo. Meta prinsipal di e Disposishonnan akí ta pa prinsipalmente protehá konsumidónan, ofresiendo nan informashon adekuá pa por tuma desishonnan bon fundá ora di apliká pa un krédito di konsumo.
Ademas, e Disposishonnan di APR akí ta sirbi pa fomentá transparensia den e merkado finansiero lokal i ta proveé un método uniforme pa kalkulá interes anual efektivo (APR). E intenshon di Banko Sentral tambe ta pa inkluí un disposishon ku ta fiha un interes máksimo den e Disposishonnan di APR akí.
Na promé lugá e disposishonnan di APR ta definí kiko ta keda konsiderá ‘Propaganda’, kiko ta ‘Interes Anual Efektivo (na ingles, APR)’, i kiko ta ‘Tasa di interes’. Tambe den e disposishon ta keda stipulá definishon di un ‘Konsumidó, ‘Dunadó di krédito’, ‘Krédito di konsumo’, ‘Akuerdo di krédito, ‘Kosto total di e krédito pa e konsumidó’ i ‘Suma total di krédito’. Pa Asina ta kla pa tur partido ta kiko ta keda komprondé bou di kada terminologia usá.
Propaganda ta kualke informashon, direkto òf indirekto, transmití via kualke medio ku un dunadó di krédito usa pa promové un produkto di krédito di konsumo. Interes Anual Efektivo ta e kosto total di e krédito di konsumo, ekspresá komo porsentahe anual di e suma total di krédito. E ta e tasa efektivo ku ta reflehá tur kosto di e krédito pa e konsumidó durante henter e akuerdo di krédito. Tasa di interes ta e tasa di interes nominal ekspresá komo porsentahe anual di e suma di krédito ekstendé na e konsumidó. Ta usa e tasa di interes pa kalkulá e interes ku ta kobra riba e krédito.
Un konsumidó ta e persona ku ta apliká pa krédito di konsumo. Dunadó di krédito ta un instituto, òf persona hurídiko òf natural ku ta ekstendé òf primintí di ekstendé krédito komo parti di su komèrsio òf negoshi i ku ta inskribí den un di e sekshon òf aneksonan di e registro di institutonan di krédito ku Banko ta atministrá. Krédito di konsumo ta krédito ku un dunadó di krédito lo ekstendé na e konsumidó pa meta personal òf doméstiko. Akuerdo di krédito ta un kontrato ku ta mara e partidonan legalmente i den kua e dunadó di krédito ta ekstendé òf primintí di ekstendé un konsumidó un sierto suma di plaka pa un sierto periodo, pa e konsumidó pag’é bèk sea via amortisashon (‘na kuota’) òf di otro manera. Kosto total di e krédito pa e konsumidó ta tur kosto di e krédito (ku eksepshon di kosto di seguro i gastunan ku e konsumidó kubri for di su ‘propio saku’), inkluso gastu di interes, komishon, rekargo, impuesto i tur otro gastu ku e konsumidó mester paga direktamente relashoná ku e krédito (segun e akuerdo di krédito) i ku e dunadó di krédito ta na altura di dje. I finalmente Suma total di krédito ta e suma máksimo di krédito ku e dunadó di krédito ta permití pa ekstendé a base di un akuerdo di krédito.
E Disposishonnan di APR akí su base hurídiko ta emití konforme artíkulo 2, insiso 2 i artíkulo 45, insiso 2 di e Ordenansa Nashonal di Supervishon di Sektor Bankario i di Krédito 1994 (PB. 1994, no. 4). Kada dunadó di fiansa mester tene nan mes na e disposishonnan aki ya ku esakinan a bira parti integral di kada lisensia òf dispensashon. Banko Sentral ta informá kada portadó di lisensia òf dispensashon al respekto.
Entrante 1 di mei 2015, e Disposishonnan di APR ta aplikabel pa tur dunadó di krédito ku ta operá lokalmente na Kòrsou òf St. Maarten. Pa kumpli ku meta di e Disposishonnan di APR, dunadónan di krédito mester publiká informashon relashoná ku APR na un manera kla den propaganda, ora di kontestá preguntanan di konsumidó tokante krédito di konsumo òf promé ku ekstendé un krédito di konsumo.