NOTISIA
Preisnan pa konsumidó na Kòrsou, desèmber 2016
Preisnan 0,2 porshento mas haltu kompará ku luna di novèmber; inflashon 2016 ta 0,0 porshento.
E Sifra índise di preis pa konsumidó na Kòrsou a subi ku 0,2 porshento na luna di desèmber 2016, kompará ku novèmber 2016.
Si kompará e periodo di e último diesdos luna te ku desèmber 2016 ku mes periodo promé ku esei, ta resultá ku preisnan a keda stabil. Na desèmber 2016 e kambionan di preis mas importante a okurí den e kategorianan di konsumo “Kuminda” i “Transporte i komunikashon”.
Henter aña 2016 e kategoria di konsumo “Kuminda” a kontribuí mas tantu na oumento di inflashon, mientras e kategoria di konsumo “Transporte i komunikashon” tabatin e influensha di mas grandi riba disminushon di inflashon.
Esaki ta sali na kla for di datonan ku a ser publiká awe dor di Ofisina Sentral di Statistik (CBS).
Desaroyo di preis na Kòrsou entre novèmber i desèmber 2016
E sifra índise di preis pa konsumidó (CPI, “Consumer Price Index”) na Kòrsou na luna di desèmber 2016 a subi ku 0,2 porshento kompará ku luna di novèmber 2016, pues di 123,9 pa 124,2.
Na desèmber 2016 e kambionan di preis mas importante a okurí den e kategorianan di konsumo “Kuminda” (+0,4%) i “Transporte i komunikashon” (+0,4%). Den e kategoria di konsumo “Kuminda” ta trata prinsipalmente di oumento di preis di e grupo di kuminda “batata, berdura i fruta” ku 2,3 porshento, mientras ku oumento di preis di gasolin ku 3 porshento i disminushon di preis di gasoil ku 2,5 porshento respektivamente tabatin e influenshá mayor riba desaroyo di preis di e kategoria di konsumo “Transporte i komunikashon”.
Desaroyo di preis na Kòrsou entre desèmber 2015 i desèmber 2016
E sifra índise di preis pa konsumidó a subi entre desèmber 2015 i desèmber 2016 di 123,2 te ku 124,2, un subida di 0,8 porshento. E sifra aki ta indiká ku e luna di desèmber di e aña ku ta tras di lomba tabata 0,8 porshento mas karu kompará ku e luna di desèmber di e aña anterior, pa loke ta trata e preis promedio di produktonan i servisionan pa konsumidó.
Inflashon na Kòrsou over di e aña kalendario 2016
Inflashon por wòrdu definí komo un proseso ekonómiko di durashon largu (por lo ménos 12 luna) di subida di preis general, ku pèrdida di balor di plaka (pues bahada di forsa di kompra di plaka) i subida di kosto di bida komo konsekuensha. E por wòrdu okashoná dor di importashon mas karu, subida di salarionan, subida di otro gastunan di produkshon / hasi negoshi, interakshon riba merkado di oferta i demanda (skarsedat di produkto / servisio), subida di margen di ganashi di negoshi i subida di e kantidat di plaka den sirkulashon.
E promedio di diesdos luna di e preisnan pa konsumidó di Kòrsou na desèmber 2016 a resultá di ta na mes un nivel ku desèmber 2015. Esaki ta nifiká ku e sifra di inflashon di desèmber 2016 ta nulo, pues 0,0 porshento. Un inflashon di 0,0 porshento ta nifiká de fakto ku over di henter e aña kalendario na averahe a surgi un balansa entre respektivamente subida i bahada di preis di produkto- i servisionan pa konsumidó.
Over henter aña 2016 e kategoria di konsumo “Kuminda” a kontrubuí mas tantu na oumento di inflashon, mientras e kategoria di konsumo “Transporte i komunikashon” tabatin e influensha di mas grandi riba disminushon di inflashon.
E sifra di inflashon di desèmber 2016 (0,0%) ta alabes e sifra di inflashon over di henter e aña 2016. Pues inflashon na Kòrsou over henter aña 2016 ta 0,0 porshento, konkretamente resultando den stabilisashon di e promedio di diesdos luna di e sifra índise di preis pa konsumidó (123,6) na desèmber 2016 kompará ku desèmber 2015.
Finalmente
For di e página inisial di e wèpsait di CBS (www.cbs.cw) por download e publikashon “CPI Statistisch Bulletin” ku ta konsistí di un análisis mas amplio tokante di e tópiko aki.