Konsumidó Alertá Volumen 3, yanüari 2014 | Page 8

Ken tin falta?

Resientemente un konsumidó tabata envolví den un aksidente di outo bastante fèrfelo. E konsumidó, ku a kaba di sali trabou, tabata bayendo kas anochi lat, ora diripiente na un krusada un otro outo manehá pa un turista, laga nos yam’é outo B, sin duna preferensha, a bula sali su dilanti. E choke tabata inevitabel i e impakto asina fuerte ku konsumidó su outo a keda lastrá bai para basta un par di meter mas leu.

Manera ta usual den kasonan di aksidente, a yama Forensys pa bin hasi e parti di registrashon i traha rapòrt di e aksidente. I akinan sierto kosnan no a bai manera mester a bai.

Konsumidó A, ku den e kaso aki ta un persona ku no ta dominá nos idioma perfektamente, den su doló i nèrviosidat, a purba na su manera di splika e empleado di Forensys kon e aksidente a tuma lugá, for di kua direkshon e tabata biniendo etc. Despues di a tende ámbos partido, Forensys a traha su rapòrt i a laga ámbos persona firma pa esaki. Konsumidó despues di esaki a keda transportá ku ambulans pa hospital pa tratamentu i opservashon.

Grandi tabata sorpresa di konsumidó A na momentu ku e la bai pa informá si shofùr di outo B a bai atendé ku su seguro kaba, di moda ku e por laga drecha su outo, e la bin komprondé ku segun e relato di Forensys ta e tin falta den e aksidente. Konsumidó A ku su derechi a pidi su agente di su seguro pa splik’é kon bin ta kulpa é di e aksidente i aki e la bin komprondé ku segun e dibuho di Forensys ta su persona ta esun ku a bula sali dilanti di outo B. Konsumidó A na su turno ta pinta kon e aksidente realmente a tuma lugá. Pa señora konsumidó su di malu mientrastantu e turista shofùr di outo B ya bai su pais bèk.

IMPOSIBEL