E Komishon di Konseho mester keda tendé promé ku pasa leinan ku ta bai tokante loke nos ta kumpra i por duna rekomendashonnan na gobièrnu si e ta haña esaki nesesario. Aki e komishon por traha ku ekspertonan pa bin ku normanan pa, por ehèmpel, kondishonan bou di kua un panaderia por traha pan òf kua supstansianan por keda poné den nos awa. Pero tambe riba terenonan no komestibel e Komishon di Konseho aki por bini ku konsepto i proposishonnan di lei i rekomendashonnan pa hisa kalidat i kòntròl di produktonan ku nos ta konsumí.
Den e último dékada e Komishon di Konseho a traha riba diferente tema pa mehorá e kalidat di nos produktonan manera e Landsbesluit Drinkwater, Landsbesluit Etiketering pero tambe riba produktonan nobo ku a i ta subi riba nos merkado. Esaki te ku 10-10-10.
Na 2003 ora ku e komishon a keda instalá e tabata konsistí di miembronan di tur sinku isla di Antia Hulandes. Despues ku Kòrsou a bira outónomo mester a bini ku un otro konstelashon di e komishon i bini ku miembronan nobo di solamente Pais Kòrsou. Aki e komishon a stòp di ehersé su tareanan i aunke ku algun miembro a trata di pone reinstalashon di e komishon riba agènda di e diferente gabinetenan ku Kòrsou a konosé for di 10-10-10 te ainda e komishon di konseho no ta aktivo bou di Kòrsou outónomo.
Fundashon pa Konsumidó a pone komo un di su metanan pa e aña aki pa hinka bida nobo den e Komishon di Konseho aki. E nesesidat di un organo asin’aki ta algu ku nos tur sigur mester ta mira su importansia. Ku aporte i soporte di tur konsumidó nos lo kuminsá un kampaña pa asina trese e tema aki riba agènda i asina urgí polítika di Kòrsou pa tene nos salú na pechu dor di hasi posibel ku nos tambe tin un stèm den loke nos ta kome, bebe i usa. Pa nos por pone normanan di kalidat na loke nos ta kumpra i mas importante pa nos por tin seguridat i konfiansa ku loke nos ta kome no ta malu pa nos salú. Keda pendiente pa nos kampaña.