DERECHI I DEBER
Den nos Warenlandsverordering tin reglanan general stipulá pa tur merkansia ku ta keda bende riba nos merkado. For di importashon, kontenido, ingredientenan, uso di aditivo artifisial, modo di transporte, etikèt, manera di bende, te na fecha di vensementu i grado di edukashon di esnan ku ta bende nos e merkansia. E lei tambe ta stipulá ku pa kada produkto spesífiko Landsbesluitnan mester keda trahá pa regulá esaki. Un ehèmpel ta e Landsbesluit Etikettering ku ta pone reglanan kiko mester tin poné riba etikètnan di produktonan ku nos ta kumpra.
Un ròl esensial den e parti di desaroyo di leinan nobo i konseho na gobièrnu pa tur loke ta trata merkansianan riba nos merkado, i normanan pa esakinan a keda duná den e mesun lei di Merkansia na e Adviescommissie Waren, òf e Komishon di Konseho di Merkansia i Alimento. E komishon aki a keda instalá riba 17 di òktober 2003 pa e Minister de Salubridat i Desaroyo Sosial di e tempu ei.
E komishon di Konseho tin e siguiente tareanan:
- Duna konseho solisitá i no-solisitá na Minister
di Salubridat tokante di tur loke ta trata e Lei di Merkansia.
- E komishon tin espasio pa duna konseho i
komentario riba tur lei basá riba e Lei di Merkansia.
- E komishon ta konsistí di un máksimo di 15
miembro di kua un tersera parti nombrá pa komersio, un tersera parti nombra pa organisashon(nan) di konsumidó i un tersera parti nombrá pa Minister.
KOmishon di konseho di alemento i merkansia
INTERMEDIO
Hopi biaha realidat di bida ta pasa plannan ku nos tin na kaminda. Ku e redada na Gato kaminda a bin topa ku un panaderia ilegal atrobe atenshon ta bin kai riba e kalidat di produkto i alimento ku nos konsumidónan ta kumpra, usa i kome. Den e kaso di por ehèmpel pan, un panaderia ilegal lo no a tene su mes na normanan. Pero si nos bisa ku, eksepto e pan blanku regulá na Kòrsou no ta eksistí nada di regla kiko si i kiko no mag di ta den nos pan, ken lo a kere esaki?