IMPOSIBEL
Kehonan den 2016
Na final di kada aña nos fundashon ta hasi un inventarisashon di kehonan di e aña ku ta terminá. Esaki pa diferente motibu. Kada aña nos ta publiká den nos rapòrt anual tur loke nos a hasi e aña anterior inkluso e kantidat di kehonan ku nos a risibí di nos konsumidónan i kuantu nos a solushoná di un manera fruktífero pa e konsumidó. E rapòrt anual ta keda publiká riba wèpsait di Fundashon pa Konsumidó.
Tin mas motibu pakiko nos ta analisá nos kehonan di e aña ku ta kaba. Nos mester sa por ehèmpel den kua sektor den nos ekonomia nos konsumidónan tin mas problema ku produkto i servisionan ku nan kumpra. Sea ta den den sektor di seguro, outo, telekomunikashon, si nos tin datonan konkreto i spesífiko den e área aki nos por bini ku maneho dirigí pa drecha i kambia kosnan konkreto den e sektor ku ta trese mas problema.
Na luna di aprel di proksimá aña Fundashon pa Konsumidó lo publiká su sifranan i su rapòrt anual den kua lo toka ekstensivamente tur aktividatnan di nos fundashon den 2016 inkluso nos estadístikanan di keho. E biaha aki na final di aña nos lo dediká mas atenshon na nos kehonan risibí i lo hasi un analisis di sorto di kehonan, sektornan den kua mas keho a keda registrá, kompanianan ku mas nos fundashon a risibí keho kontra dje i tambe estadistikanan di nos intermediashon. Kuantu kaso nos a resolvé pa nos konsumidónan, kua ta e kompania ku ta purba di resolvé kehonan i risibí. Pero tambe kua te esnan ku nunka no ta koperá òf a reakshoná. Na final di otro aña nos fundashon lo ke bini ku un tòp 3 di e mihó i pió kompanianan pa atendé kuné kua servisio i maneho di keho. Asina promové pa abo konsumidó kumpra i gasta bo plaka seka e kompania ku ta meresé bo konfiansa i sèn. Pues spera un enfoke hopi mas dirigí i konfrontadó di Fundashon pa Konsumidó den 2017, kuminsando ku publikashon di nos análisis di 2016 na mart di 2017.
Loke nos por bisa preliminarmente di kehonan den 2016 ta ku mayoria keho a trata di kalidat di produkto i servisionan ku nos konsumidónan ta kumpra. Aparatonan eléktriko, muebel, sapatu, paña, kasi den tur sektor di produkto nos a risibí un keho. Esei ta pone ku pa 2017 Fundashon ta bai enfoká riba kalidat di produkto i servisio ku komersiantenan ta bende na Kòrsou. Mester yega na normanan internashonalmente aseptá pa tur loke nos ta usa i sigur loke nos ta kome i bebe.
Un otro punto ku nos por saka a base di e sifranan te asina leu ta ku hopi kaso a keda será sin solushon e aña aki. Tin biaha ta pa motibu ku e komersiante no ta reakshoná riba kartanan di nos fundashon. Pero tambe sa pasa ku e konsumidó no ta bini dilanti ku pruebanan di su keho òf ta resultá despues den e trayekto ku su historia no ta kuadra totalmente ku realidat.
Nos lo bai hasi un analisis profundo di tur nos kehonan di e aña aki. I lo bini bèk i hasi nos trabou di intermediashon diu keho transparente pa nos komunidat. Asina nos lo sigui midi rendimentu i servisio di nos kompania i purba di hisa e norma di produkto i servisio aki na Kòrsou.
Fundashon pa Konsumidó lo presentá analisis detayá di kehonan den 2016