Subida di tarifa di internèt
Resientemente e kompania di telekomunikashon UTS a anunsiá subida di tarifanan di internèt ku lo drenta na vigor entrante promé di yanüari 2017. Esaki a lanta hopi reklamo serka nos konsumidónan.
Via di un karta, UTS a informá su klientenan ku pa por mantené e kalidat haltu di servisio, nan mester ahustá e suma mensual di e diferente paketenan di internèt. Den e karta aki tambe por mira e montante nobo, ku lo ta visibel riba e faktura di yanüari 2017 i ku lo keda repartí fin di desèmber 2016. Den e mesun karta UTS ta sigui informá ku si un kliente no ta dispuesto na sigui ku e servisio di UTS por pasa na ‘Customer Service Center’ di UTS na Colon i yena un formulario di kanselashon promé ku 30 di desèmber 2016.
Un konsumidó tin derechi di wòrdu informá dor di e kompania na momentu ku esaki tin pensá di hasi kualke tipo di adaptashon na e kontrakt ku por afektá e konsumidó. Esaki ta un di e derechinan básiko di un konsumidó. Tambe e kompania mester brinda e konsumidó chèns pa skohe un otro kompania si e no ta di akuerdo ku kualke kambio ku keda introdusí.
Fundashon pa Konsumidó ta di opinion ku UTS a aktua di un manera korekto, dor di informá su klientenan di e subida di preis di e servisio di internèt i duna nan opshon di kanselá si nan ta deseá esaki. Pues esun ku no ke karga ku e gastu èkstra aki, ta liber pa stòp ku e kontrakt di internèt serka UTS. Di e otro banda, Fundashon pa Konsumidó ta konsehá klientenan aki pa kompará e preis i spit di bo pakete di internèt aktual ku esun ku otro kompanianan di telekomunikashon ta ofresé. Analisá kua kompania i kua pakete ta kumbiní abo mas i hasi bo eskoho di un manera konsiente. Kòrda si ku esaki mester sosodé promé ku 30 di desèmber próksimo.
Si tin kualke pregunta relashoná ku e tópiko aki, por tuma kontakto ku nos na 462-666 òf via e-mail [email protected].