Konsumidó Alertá Volumen 29, Novèmber/Dezèmber 2016 | Page 15

Den e periodo di 5 pa 7 di desèmber Fundashon pa Konsumidó a bishitá 16 supermerkado pa anotá preis di e produktonan di makutu di Pasku. A anotá preis di 120 produkto for di vários kategoria, entre otro ham, orea, biña, ròm, serbes, limonada, anasa den bleki i hariña. Supermerkadonan ku a partisipá na e komparashon di preis aki ta, 2000, Arco Iris, Arti’s, Best Buy, Bon Bini, Boulevard, Centrum Mahaai, Centrum Piscadera, Colon Supermarket, Esperamos, Exito, Mangusa Rio, Mangusa Hyper, Van den Tweel, Ruyterkade i Vreugdenhil.

Pa asistí konsumidónan den nan kompra di fin di aña, Fundashon pa Konsumidó a hinka tur e sifranan den un tabèl i a hasi un análisis di esakinan. Fundashon pa Konsumidó ke enfatisá ku nos no a tene kuenta ku kalidat, ni tampoko pais di orígen den e komparashon di preis, esaki por tin influensia riba e preisnan.

Bon Bini Supermarket, esun mas barata!

For di nos análisis di pakete di Pasku, Bon Bini supermarket a sali e supermerkado ku mas tantu produkto na mihó preis. Di e 120 produktonan ku wòrdu anotá, e supermarket aki tin 24 produkto na un mihó preis. E produktonan aki ta Pekelé, Makrel, Salmou ku wesu, Filèt di Galiña, Orea, Bòter di Pikalili marka Koeleman, aseituna ku pipita di marka Eureka, karabanso, rom San Pablo (70cl),

ponche Kuba (75cl), whisky Scotch Special (70cl + 1.5ltr), Whisky High Commisionair (70cl), Soda Water di marka Selters (500ml), Anasa den bleki di marka Dole (8oz + 20oz), Anasa den bleki di marka Roland (8oz), Rasenchi marka Ligo (250gr), Buskuchi Noel, Mayonaise marka Kraft (15oz + 30oz) i Mayonaise marka Remia (500ml) i chukulati Arcor i Bon o Bon (119gr).

E di dos supermarket ku mas mihó preis a resultá Mangusa Hyper ku 21 un produkto i e di tres supermarket ku mas mihó preis a resultá di ta Mangusa Rio Canario ku 19 produkto.

Mangusa Hypermarket e supermerkado mihó surti

Di akuerdo ku resultadonan di e análisis di pakete di Pasku ku Fundashon pa Konsumidó a hasi, Mangusa Hypermarket a resultá e supermerkado mihó surti ku 91 produkto for di e pakete di 120 produkto. E di dos supermerkado a sali Esperamos Supermarket ku 88 produkto, siguí pa Mangusa Rio Canario ku 87 produkto.

Diferensia di preis

Fundashon pa Konsumidó a tuma nota di un diferensia grandi di preis, prinsipalmente den preisnan di bibida alkohóliko. Por ehempel Whisky High Commisionair (2 ltr) ta kosta na Arco Iris supermarket fl. 49.95 miéntras ku na Mangusa Rio i Hypermarket esaki ta kosta fl. 65.89. Esaki ta un diferensia di preis di fl. 15.94. Pa loke ta trata Dewar’s White Label (2 ltr), Best Buy tin e whisky aki na un preis di fl.67.50. Na supermarket Colon, e mesun whisky aki ta kosta fl. 79.95. Kual ta un diferensia di fl. 12.45. Pa un mihó bista riba preisnan aktual den supermerkado i pa komparashon di preis ku añanan anterior por fabor bishitá nos wèpsait, www.fundashonpakonsumido.org. Konsulta e listanan di preis aki i hasi kompra na un manera konsiente i responsabel.

Finalmente nos ta deseá tur nos konsumidónan un felis Pasku i un próspero 2017. Disfrutá di e temporada festivo aki i hasi kompra di un forma responsabel, teniendo kuenta semper ku e presupuesto.

MAKUTU DI PASKU

Paga tinu riba preis den fin di 2016

Felis dianan di fiesta