KOMPARÁ I KUMPRA
E PALU DI PASKU PERFEKTO
Algun sugerensia pa
Nos ta den temporada di fin di aña. Un temporada ku hopi di nos konsumidónan ta konsentrá riba hasi kompra, aktividatnan festivo i dòrna kas. Den e artíkulo aki nos ta para ketu riba mantenshon di bo palu di Pasku, kon pa dòrna esaki i tambe e kolonan trènt pa fin di aña aki.
Promé ku bo kumpra
Promé ku bo kumpra bo palu di Pasku, kompará preisnan pa haltura na diferente establesimentu. Den e temporada di fin di aña aki, tin diferente establesimentu ku ta bende palu di Pasku i adorno. Ta pa e motibu aki abo komo konsumidó mester ta konsiente di unda ta kumbiní abo mas.
Despues di a kompará preis, NO kumpra mesora! Analisá e palu di Pasku promé. Ta hopi importante pa bo mishi ku e takinan pa wak si e blachinan òf e asina yamá, anguanan ta kai. Si nan ta kai, NO kumpr’é! Esaki ta un indikashon ku e palu di Pasku no ta unu fresku i ku tur probabilidat ku bo palu di Pasku lo ta unu seku prome ku 25 di desèmber.Si e Palu di Pasku ta unu fresku, laga nan kòrta un pida abou di e stam, promé ku bo bai kuné.
Mantenshon
Despues di a kumpra bo palu di Pasku, promé kos ku bo mester hasi ta: Pone e palu mesora den e pia òf hèmber ku awa. Preferibel awa friu. Motibu di esaki ta paso e palunan aki a kustumbrá den temperatura friu. Tambe bo por agregá klòmpinan di eis tur dia den e awa pa mantené esaki friu.
Di dos kos ku mester tuma lugá ta e parti di kitamentu di e nèt. Kita e nèt i duna e palu di Pasku un chèns di sosegá i pa e takinan haña nan lugá bek. NO dòrn’é mesora! Laga e palu drumi sigur un anochi, ya asina e takinan por bai nan lugá.
Un tep tambe sumamente importante i ku hopi di nos no sa tene kuenta kuné, ta e sitio kaminda e palu di Pasku ta bai wòrdu poné . Ta konsehabel pa NO pone esaki den un espasio kaminda e ta haña hopi kayente. P.e. banda di un televishon, stereoset etc. Mas fresku e espasio ta, mas e palu di Pasku dura.
Sugerensianan kon pa dòrna un palu di Pasku.
1. Dòrna bo Kèrstbom di ariba bai abou. Esaki ta konta pa
bo lusnan tambe.
2. Promé kos ku ta bai den e palu di Pasku ta bo lusnan.
Asina bo ta haña un mihó bista di unda bo por
pone demas adòrnonan.
3. Balanan chikitu ta bai ariba, I esnan mas grandi abou.
Esaki ta konta pa e demas adòrnonan tambe.
4. Ta konsehabel pa uza lus LED. Ta konsiente si ku esaki
ta un poko mas kostoso, pero nan ta bai mas tantu
aña. Otro benefisio di Lus LED ta ku e no ta bira
kayente I esaki ta evitá tambe ku e palu di Pasku ta
seka.
5. Bo por spray e kèrstbom tambe ku spray di kabei pa
hasi e blachinan duru, i evitá ku hopi blachi ta kai.
Buska un spray ku no tin holó.
Trènt pa 2016
Nos di Fundashon pa Konsumidó a tira un bista i a tuma nota ku kolonan manera blou bèrdè, blou turkuas, blou skur, koló kòra kimá i oraño/oro ta e kolonan pa 2016. Naturalmente por uza e kolonan tradishonal kual ta oro, plata i blanku pa kibra e kolonan trènt pa 2016. Fundashon pa Konsumidó ta konsehá tur konsumidó pa promé ku kumpra adòrno pa Pasku, tira un bista den bo kosnan di añanan anterior. Manera nos a bisa kaba, kolonan tradishonal bo por kombiná semper ku otro koló. Pues kisas no ta nesesario pa kumpra ful un sèt di adòrno nobo, si bo por kombiná. Hasi uzo di bo kreatividat i krea bo palu di Pasku perfekto.
"E mihó regalo rondó di un palu di Pasku
ta e presensia di un famia felis"
Un kontribushon di sra. Janice Welhous