DERECHI I DEBER
KONDISHONNAN GENERAL DI KOMPANIANAN DI SEGURO MESTER TA KLA I KOMPRENDIBEL
For di aña 2013 Fundashon pa Konsumidó den estrecho koperashon ku kompanianan di seguro, a instituí un Komishon di Disputa ku ta atendé kehonan ku un konsumidó-asegurado entregá kontra di su kompanianan di seguro.
Fundashon pa Konsumidó di manera serio, aktivo i diligente ta atendé e kehonan aki pa finalmente tuma un desishon por eskrito. E tipo di desishonnan aki ta di un balor hopi haltu, pa motibu ku ora e keho di e asegurado wòrdu haña fundá pa e Komishon, Korte den mayoria kaso ta sigui konklushon di e Komishon di Disputa. Mester bisa ku esaki ta un logro grandi, ku Fundashon pa Konsumidó por ta berdaderamente orguyoso di dje.
Kedando den e ámbito di seguro, nos ke elaborá riba un veredikto masha interesante di Korte di Apelashon tokante kondishonnan general den un pólisa di seguro, ku a keda usá kontra di un konsumidó-asegurado.
KASO
Un pareha ta kumpra un kas for di un di nan su mama i despues di e kompra, e mama ta keda biba temporalmente den e kas. Komo konsumidó-asegurado e kumpradonan ta sera un seguro di kandela privá pa e kas serka un kompania di seguro. Despues di 9 luna, e habitante di e kas, esta e mama, ta muda i e kas ta keda para bashí. Pa motibunan te awe deskonosí, e kas despues di e mudansa ta pega na kandela i ta sufri un daño mínimo ku despues ta keda kubrí pa e kompania di seguro. Ora di yena e formulario pa pidi pago di daño, e konsumidó ta hasi deklarashon na e trahadó di seguro i ta pone un krus den e vak di ‘no’ ku ta puntra si e kas ta habitá. Despues di un par di luna e kas ta bolbe pega na kandela i e biaha aki ta kima praktikamente kompletu. Sinembargo, e biaha aki seguro ta ninga di kubri e daño, mustrando riba un artíkulo den e kondishonnan general ku ta bisa ku ora ku e risiko pa kandela oumentá, e konsumidó mester partisipá esaki na e departamento konserní di e kompania di seguro.
Segun e kompania di seguro, dor di a keda sin bisa ku e kas ta para bashí, e konsumidó no a kumpli ku su obligashon di mèldu, ankrá den e kondishonnan general. E konsumidó ta hiba e kompania di seguro Korte i eksihí pago di e daño kompletu na balor di 400.000,- òf di 300.000,- si keda proba ku e konsumidó prome ku e kandela tabatin plannan konkreto pa basha e kas abou i lant’e di nobo.
Korte den prome instansia ta duna e konsumidó-asegurado rason i honra e petishon di daño i perhuisio di 400.000,- Kontra e desishon aki e kompania di seguro ta bai den apelashon.