E bendedó por stipulá den su kondishonnan general na ki momentu e tin derechi di oumentá su preis. Por ehèmpel si tin un periodo largu entre momentu di benta i esun di entrega. Den un kaso asina e kumpradó tin su derechi pa kanselá e kompra a base di e kambio. Si e preis a keda kumbiní bou di restrikshon (onder voorbehoud) tambe e kumpradó tin derechi di anulá e kompra a base di e subida di preis.
E bendedó no tin mag di kambia preis sin mas despues ku e kompra a keda efektuá. Den kaso ku e pone esaki den su kondishonnan general di benta, e konsumidó semper ta haña e derechi pa kanselá e akuerdo di kompra. E bendedó no por ekskluí bo derechi di kanselashon den su kondishonnan di benta.
Si abo komo konsumidó haña bo den un situashon semehante ku e bendedó ta ninga di drecha e outo, òf bo no ta keda kla ku e bendedó pa ku e reparashon òf di ripiente e bendedó ke kambia preis riba bo, abo kumpradó mester kuminsá na manda e bendedó un mensahe por eskrito den kua bo ta splika bo keho.
Splika bon, kronológikamente i detayadamente kiko ta bo keho i kiko bo ta spera di e bendedó. Dun’é algu di tempu pa e kontestá.
Fundashon pa Konsumidó tei pa asistíbo den e proseso aki dado kaso bo mester di ayudo. Si e bendedó no ta reakshoná adekuadamente Fundashon pa Konsumidó lo tuma e keho i intermediá na nòmber di e konsumidó.